Militenti, simpatizenti, difensori di e nostre lingue sò chjamati da u Cullettivu « Da ch’elle càmpinu e nostre lingue » à adunìscesi di pettu à u Retturatu d’Aiacciu, sàbatu u 10 d’ottobre à 11ore.
U Cullettivu s’hè creatu un annu fà quandu a riforma Blanquer hè stata messa in ballu cù e so cunsequenze tremende per l’insignamentu di e lingue regiunale à a scola.
Un millaia di manifestanti anu sfilatu in Parigi, sin’à u Ministeru di l’Educazione naziunale, è malgradu un appuntamentu cù u ministru, ùn ci hè statu manera di fà ricunnosce e nostre rivendicazioni.
E dimarchje di u Cullettivu sò firmate senza sèguita è a rientrata hà cunfirmatu i nostri penseri : forte calata di l’effettivi, abandonnu di l’insignamenti di e lingue regiunale in parechji stabilimenti, dizzinghera di i zitelli è i so parenti…
Tandu, u Cullettivu hà purtatu u so messagiu sin’à l’Eliseu cù u sustegnu di 105 parlementarii, deputati, senatori, deputati aurupei, da dritta, manca, eculugista è regiunalisti. U Presidente di a Repùblica ùn ci hà micca ricevutu ma hà dumandatu à u Ministru di l’Educazione naziunale per stà à sente e nostre dumande :
– parità di u statutu di e lingue regiunale nant’à quellu di e lingue anziane
– apertura di nove classe immersive in scola materna
– integrazione di l’insignamentu di u u fiamengu è u franco pruvinzale ind’è a scola pùblica.
A data di ssa riunione ùn hè stata ancu cumunicata.
Per quessa chì u Cullettivu hà decisu torna d’un azzione forte, dapertuttu in Francia.
U 10 d’ottobre pròssimu, à 11 ore, di fronte à tutti i Retturati, eletti, insignanti, elevi, parenti, raprisententi assuciativi, sindicati, militenti… tutti s’anu da mubilizacci per una « Ghjurnata di e lingue regiunale ».
L’Alsazia, a Brittagna, a Catalogna, a Corsica, a Flandria, l’Occitania, u Paese Bascu, a Savoia… tutte sse regioni urganizèghjanu un accolta di fronte à u so Retturatu. Ci seranu cusì accolte in Aiacciu, Bayonne, Ècchisi, Strasburgu, Lille, Perpignan, Montpellier, Pau, Carcassonna, Bordeaux, eccèttera…
A situazione sanitaria ùn hè micca un tràmpalu, cù màschi è rispettu di e distanze suciale, saremu rispettosi di e cunsigne di securità.
Ci tocca di mustrà chì in tutti i lochi induv’ellu ci hè una lingua da difende, a ghjente s’hà da adunisce. Vulemu un statutu pè e lingue regiunale, vulemu sparghje e nostre lingue ind’è u spaziu pùblicu, vulemu tramandale à e nove generazioni, vulemu ch’elle càmpinu e nostre lingue !
U guvernu mantene una pulìtica chì tomba à e nostre lingue. U perìculu hè forte di vèdele sparisce. A ruttura trà e generazioni hè già fatta. Per quessa ch’ellu hè imperativu di pudè agisce cù a scola. L’Educazione naziunale hà sà chì mena cù a so pulìtica linguicidia.
Allora, o cari, muvìtevi ! Mubilizate parenti è amichi, aiutèmuci è falemu tutti in Aiacciu u 10 d’ottobre, da ch’ella campi a lingua corsa ! Aiò ch’hè ora ! •