Quattru scole, una quindecina d’insiginante è d’aiute materne, più d’una vintina d’impiecu cù l’amministrativi, più d’un centu di zitelli : Scola Corsa hà francatu a so terza rientrata quist’annu è sparghje una bella dinàmica ! Sò parechje e cumune à vulè accoglie una scola. Ùn manca più chè a cuntrattualisazione cù u Statu da pudè spàrghjesi in tutta a Corsica. Aspettendu, ancu assai ch’ellu ci hè a suvvenzione di a Cullettività di Corsica, ma dinù l’aiutu numarosu di mondu imprese è sustegni da tutte e mamme ! Di sicuru, s’ella perde o l’una o l’altri, l’associu chì riposa nant’à un impegnu militente forte, ùn puderebbe campà. Bramemu dunque ch’ellu s’acconci u malentesu cù u Statu è ch’elle cuntinuèghjinu l’imprese à pòrghjeci sustegnu. Tandu, da quì à qualchi annu, puderemu gode di i frutti di ss’òpera magnìfica à prò di a nostra lingua. Forza Scola Corsa !
” Dopu à l’annunziu, palisatu da a stampa, d’una lettera prefetturale mandata à a presidenza di l’Esecutivu di a CdC è à i so servizii, Scola Corsa tene à rasserenà tutti i membri di u so retale (impiegati, famiglie è sustenitori). Neguziazioni tecniche sì sò messe in anda da truvà suluzioni bugettarie, amministrative è giuridiche da perennizà u funziunamentu di a struttura in un quatru securizatu. Siamu cunvinti ch’elle sbuccheranu prestu prestu ste discussioni à fin’ di perseguisce u svilluppu d’un mudellu chì susciteghja adesione è entusiasimu criscente è chì dimostra un acquistu di cumpentenze sempre di più maiò è ricunnisciute da tutti.
Suite à l’annonce relayée par la presse, d’une lettre préfectorale envoyée à la présidence de l’Exécutif et à ses services, Scola Corsa veut rassurer tous les membres (employés, parents et partenaires) de son réseau. Des négociations techniques sont actuellement en cours pour trouver des solutions budgétaires, administratives et juridiques afin de pérenniser le fonctionnement de notre structure dans un cadre sécurisé. Nous ne doutons pas que ces négociations aboutiront très rapidement afin de poursuivre le développement d’un modèle qui suscite adhésion et enthousiasme grandissants et fait la démonstration d’une compétence toujours plus accrue et reconnue de tous. ” •
→ Sustenite à Scola Corsa, mandate u vostru donu à : Associu Scola Corsa, BP 12, 20416 Ville di Petrabugnu o nant’à HelloAsso
Quattru quistioni à Ghjiseppu Turchini, presidente di Scola Corsa *
Cumu s’hè passata ssa terza rientrata per Scola corsa ? À chì ne simu ?
Ci hè pròpiu da esse suddesfi da sta rientrata. Dui fatti maiò sò da mette in risaltu : l’apertura d’un quartu situ in Corti induve una sguatra cumpetente è decisa hà fattu miràculi da funziunà in cundizioni òttime è l’affaccata di i nostri primi CP in Bastia è in Biguglia. Pè u restu, cù più di centu ellevi, è 13 livelli di classe nant’à i quattru siti di Bastia, Biguglia, Sàrrula è Corti, si stende u retale, suscitendu entusiàsimu è addesione è acquistendu sperienza è credibilità. E maestre è l’aiute materne fàcenu un travagliu magnìficu cun assai impegnu è fede ; i parenti s’investìscenu sempre di più in scole chì sò e soie è amministrativi è benevulenti ùn còntanu e so ore da assigurà un’intendenza cutidiana bella greve. Ch’elli sìanu tutti quì laudati è ringraziati !
Quist’annu aprite u CP cù l’imparera di a lettura è a scrittura. Hè una tappa impurtantìssima…
A classa di u CP, difatti, hè un mumentu pernu di u parcorsu sculare. A nostra andatura pedagògica s’arremba à u cuncettu chì a lingua corsa sviluppi una lògica funètica chjarìssima è assai didattica. Scrive ciò ch’ella sente è dice ciò ch’ella scrive. Ci permette, st’oppurtunità, di porghje à i sculari l’ernesi necessarii da ammaistrà l’entità sillabiche, i funemi, po e prime custruzzioni sintàttiche. L’attività sò sempre sviluppate in un riccu paragone cù e ràdiche latine chì strutturèghjanu dinù u francese è l’altre lingue rumàniche. U scopu, torna una volta, essendu di pruduce lucutori bi-plurilingui asgiati. E nostre insignanti avìanu anticipatu sta fasa cruciale chì hè un pezzu. Ci emu riflettutu da l’iniziu è emu organizatu un staziu cun tutte e stitutrici, di lugliu scorsu a prima settimana di e vacanze.
Cumu si passa a furmazione di i vostri futuri insignanti ?
Hè una di e scumesse ch’ellu ci tocca à sguassà quella di a furmazione. Giovani chì pàrlinu corsu, si ne busca sempre di menu è impreme daveru da ricustituisce u vivaghju da rivittulisce una pràtica salutifera. Per ciò, dapoi annu, emu mossu una cullaburazione cun l’Afpa è, grazia à u so impegnu, s’hè lanciatu una furmazione induv’elli intervènenu prufessiunali cumpetenti. Duie stitutrici è duie aiute materne arrullate quist’annu èscenu da stu cursus (quattru arrolli per sette stazianti.) Da ch’elle seranu accurdate e prime cuntrattualizazioni cun l’Educazione naziunale, ci tuccherà a definisce mudalità di furmazione nove cun l’INSPE di l’università di Corti da appruntà candidati à u cuncorsu specìficu di e scole immersive.
In trè anni, avete avanzatu assai, ma site sempre chjuchi chjuchi per raportu à i bisogni di a nostra lingua… a decisione di u prefettu di Corsica di rimette in causa a suvvenzione di a CdC face male ?
Simu stati surpresi da sta decisione postu chì, fin’à avà, e duie prime annate, nimu avìa truvatu nunda à dì. Ramintemu dinù chì a ripresentazione sana di l’eletti di a CdC hà vutatu à l’unanimità di lugliu scorsu sta cunvenzione triennale oghje impuntata di ditu. Simu cunvinti però ch’elle sbuccheranu prestu e neguziazioni tècniche trà servizi territuriali è statali nant’à a definizione d’un quatru giurìdicu, amministrativu è cuntàbile segurizatu è perennu. À l’ora ch’elle s’àprenu trattazioni stòriche, purtatrici di speranza è d’edificazioni virtuosi, seria impensàbile di toglie o puru d’intravà una dimarchja cusì simbòlica è fundatrice. •