Scola Corsa hà trè anni. Sò nate di ferraghju 2021 l’associ di e scole di Bastia è di Biguglia ! Èranu 25 i primi ciucci accolti è cinque e maestre è l’aiute materne à scumbatte da fà nasce è cunfurtà in ssi cerbellucci a lingua corsa !
A prima rientrata s’hè cusì fatta u 6 di sittembre 2021 cù l’aiutu citatinu è stituziunale.
A seconda rientrata hà cuntatu 67 zitelli è 11 maestre è aiute materne ! Una terza scola s’hè aperta in Sàrula Carcupinu.
A pròssima rientrata hà da cresce torna cù, si spera, duie scole supplementarie, l’associu francherà a centunaia di zitelli è cunterà una vintina d’impiecati. Forse di più, s’ellu ghjunghje à apre e scole bramate… Si dipende di l’appoghju ch’ellu truverà. I bisogni i cunniscimu :
– una cuntrattualisazione cù u ministeru di l’Educazione naziunale chì li permetterà d’avè u drittu di finanziamentu pè e paghe di l’insignante.
– una cunvenzione triennale cù a Cullettività di Corsica permettendu di cunfurtà u so bugettu è di parà à e spese.
– un sustegnu rinuvellatu di i donatori, imprese è particulari !
E scole sò gràtisi pè i zitelli è i so parenti à i quali si dumanda solu d’impegnassi ind’è l’amministrazione di e scole. Vale à dì ch’ellu ci hè bisognu di finanzà da per ellu l’associu.
Ùn anu chè trè anni e nostre scole, ma sò già carche à prumesse cù zitelli chì pàrlanu trà d’elli in lingua corsa è à spàrghjenu in casa cù i parenti incuragiti anch’elli à parlà corsu !
Appughjata nant’à u retale Eskolim ch’adunisce tutte e scole immersive di Francia, Scola Corsa hà messu in ballu u so pròpiu sistema di furmazione di i maestri è sò già 8 l’allevi à amparà u mistieru cù cunvenzione incù l’Afpa.
Un avvene hè apertu. Allora bon’anniversariu à Scola Corsa è longa è bella vita ! •