L’intìtulu era già una bella prumessa. Ci èramu stu 24 d’ottobre à u Spaziu culturale di Biguglia. È cume sempre cù Maì, ci simu campati !
I lumi si spènghjenu, a sala si face silenziu. Entre Alanu Gherardi, u direttore di u spaziu culturale, animatore di u gruppu Missaghju, ma sta volta, ùn canta micca. Hè quì per cuntà. Cuntà cù a stessa passione chì quand’ellu canta, è in grazia à a piuma aggalabata di Marc’Andrìa Castellani ch’hà scrittu ssu filu stòricu di ssi quarant’ani di cantu cù I Chjami Aghjalesi, ci porta à campà torna tutte st’annate è i messagi lampati da ssu gruppu miticu di a scena nustrale.
A storia principia in San Ghjisè di Bastia in u 1977, pò esce u primu discu in u 1979, « ci èranu sti giuvanotti passiunati di mùsica è di cantu chì vulìanu campala è cantala cum’è una festa a so Corsica » dice Alanu Gherardi. « Ci era Camellu Albertini, Alain Nicoli, Petru Fondacci, eppò ci era tutta sta sterpa di i Pesce, Maì è tutti l’altri ». A voce ribomba in u silenziu di u Spaziu, « nàscenu trè accordi di ghitarra, un pizzicatu di viulinu è entre a vucione di Maì » cuntinueghja Alanu Gherardi…
È Maì entre in scena daveru cù una decina di i so cumpagni di I Chjami Aghjalesi è tutta una sterpa di musicanti, chì prumèttenu una bella seratona in mùsica è cantu cum’elle sò state rigalate dapoi quarant’anni è più à u pòpulu corsu da sse vucioni militente di a Corsica è di a so cultura.
I capi sò imbiancati, e panze anu pigliatu a suprana nant’à l’adduminali, ma e voce si fàcenu sempre putente è i rìtimi scuzzùlanu i muri di u spaziu. A mùsica s’infuria, i diti di Ceccè Pesce sàltanu trà una corda è l’altra, i viulini s’infiàranu. Schiàttanu in fùria trà mezu à u pùblicu e prime sciaccamanate da accumpagnà i rìtimi, u pùblicu si maraviglia, u surisu hè nant’à tutte e lapre. È sfìlanu frà i più belli canti di I Chjami Aghjalesi, è à tempu chì e nostr’arechje s’ingòrganu di sse voce frà e più belle di Corsica, è chì i nostri cori s’ingònfianu di piacè, si mìschianu in capu l’oghje è l’eri sempre cuntatu da Alanu Gherardi chì affiura a stòria d’ogni canzona. Sfìlanu l’anni cù l’intìtuli di i dischi, Nant’à u solcu di a storia, Esse, L’altu pratu di a memoria, U mio cantu, Guerrieri di l’eternu, Cuntrasti è ricuccate, Pòpulu vivu, Credo, I vinti cinque baroni, Sventulerà, A chjama, I quarant’anni… più d’una dodecina è più d’un centu di canti rigalati. Tutti cantati ? Innò ùn hè pussìbule, ma a serata dura duie ore passate, è u pùblicu sciaccamaneghja, frischja, mughja. I cantarini pìglianu piacè, sciaccamanèghjanu anch’elli, Maì ùn hè più cusì sticchitu, schiàtanu i so diti chì bàttenu a misura cù a punta di u so pede è ancu u so capu si prova à trabalzà in un pìcculu ballettu di u collu… Campa a so mùsica è sparte u piacè cù u pùblicu, sò I Chjami Aghjalesi, allegri di sparte l’allegrìa, fieri di cantà una Corsica ch’ùn rende l’arme, à son’di ghitarra è viulinu trà a lotta d’un pòpulu ch’ùn si vole more è a dulcezza di a puesìa d’un ideale sempre vivu. Càntanu e nostre brame è quelle di l’altri pòpuli. È i cori bàttenu in pettu cù e percussioni.
« Un sentite I Chjami Aghjalesi
Chi mai ùn si pianteranu di mughjà
A libertà…
Libertà »
Avemu passatu una bellìssima serata. Sè v’avete qualchi dùbitu nant’à l’avvene naziunale di a Corsica, è tandu u core un pocu foscu, andate pò à rifiatavi à una serata di Maì è di i Chjami Aghjalesi. Da empie i vostri cori d’ànimu è speranza. •
• I musicanti : Sebastianu Dussol à e percusioni, à a bassa Stèfanu Leca, à a ghitarra, Jérôme Pieracini è Ceccè Pesce, l’alto, Mariana Valentini, à u viulinu Benjamin Ceccoli è Lisandra Medori.
• I cantadori : Petru Santu Guelfucci, Marc’Antone Pieracini, Anthony Bertrand, Paulu Felice Nasica, Lisandru Pesce, Jean Battì Albertini, Saveriu Monte, Camellu Albertini, Vincente Bonci, Ghjuvan’Marcu Bertrand…
