S’hè spentu Antone Paoletti, canterinu è militente culturale di prima trinca à u senu di u gruppu I Voci di a Gravona, natu in tempu di u Riacquistu. Antone Paoletti era frà i membri fundatori cù Natale Luciani. À a morte di Natale, si pianta u gruppu ma ripiglia in principiu di l’annate 2000 cù uni pochi di giòvani. Arritti manda cunduleanze fraterne à tutti i soi è sparte l’umagiu in rima di i s’amichi di I Voci di a Gravona. •
À traversu l’universu rimbumbarà a tò voci,
Tra i Rimi è a to ghitara
Turnara sempri a riturnedda
Fata di duii paroddi
Di passioni sincera
U spaventu di stintu è di cori
D’un babbonu inc’un ardori.
Oramai spassighjeghji
Ancu tù pà i pastricciali
Arrimbatu à i to amichi
Pà i chjassi canterini
Marchjaremi ancu noi
Pà a santa libertà
Stampata incu a tò voci
À l’eternu caru cumpà. •