S’hè spentu u 7 di ghjennaghju Michel Sorbara, merre di a Valli d’Orezza, à l’età di 78 anni. L’Orezza si strova doppiamente addulurita è sò dui amichi chì si ne vanu inseme cù Petru Ghjuvani Stefani, merre di Pedipartinu.
Michele Sorbara era statu presidente di u Sporting Club di Bastia da 1979 à 1982. A sola presidenza à avè vintu un trofeu. Quellu di a Cuppa di Francia di ghjocu à pallò in u 1981 ! Un magnìficu ricordu per tutti, vistu a prudezza contr’à i Verdi di Saint-Etienne !
Michel Sorbara era tenutu caru è appreziatu assai. Attaccatu à i valori corsi, appassiunatu di a so terra, s’hè impegnatu tutta a so vita cù generosità. S’hè impegnatu assai dinù pè u ghjocu à pallò amatore à u senu di a Lega corsa.
Arritti prisenta e so cunduleanze afflitte à a so moglie, Marika, i so figlioli è figliulini, surelle, nipoti, tutti i soi adduluriti, frà i quali a grande famiglia di u Sporting Club di Bastia.
Ch’ellu riposi in pace. •