Cuntinuemu a nosta rubrica da cuntà i tesori di a nostra lingua à traversu l’Antulugìa di e spressioni corse di Farrandu Ettori. Sse spressioni ci impàranu assai nant’à a nostra stòria è ciò chè no simu. Omu si deve di tramandale.
Di Sant’Austinu, babbu di a ghjesgia anch’ellu, dice Farrandu Ettori, ùn si ritene chè a so giuventù ch’ellu palesa ind’è e Cunfessioni. S’omu dice di qualchisìa ch’ellu ne face quant’è Santu Austinu, ùn ci vidite micca una loda, dice torna u scrivanu, ma piuttostu una sclamazione di maliziu :
Santu Austinu
Dui capa annant’à un cuscinu !
Ghjè dì u gèneru d’attività ch’omu imprestava vulinteru à u grande Duttore di a Gràzia. Ma sta reputazione, dice Farrandu Ettori, puderebbe vene piuttostu di e religiose austine, secondu u dettu rumanu : monica di sant’Agustinu, co’ du’ teste sopra er cuscino, di u quale a spressione corsa averebbe sguassà u principiu. •
Ùn hè po mancu un san Cristòfalu !
Si dice di qualchisìa cunsideratu un pocu troppu in fùria cum’è un atletu. San Cristòfanu, secondu a legenda, hà purtatu u Cristu nant’à e so spalle da pudè francà un fiume (ssu nome venerebbe di quì : Christophoros, quellu chì porta u Cristu). À u mediuevu era raprisentatu cum’un colossu.
San Cristòfaru ch’in coddu
Barcò u fiumu à lu Signori.
(Mgr de La Foata, Rusariu di Marducheiu, p78)
In l’Ottave giocose di Prete Guglielmi, spieca torna Farrandu Ettori, più cunnisciute sott’à u nome di Malannata del 1712, unu di i persunagi, un paisanu d’Alisgiani chì si rende in Bastia per testimugnà à un prucessu, attesta ch’ellu hà l’intenzione di dì a verità fin’tantu ch’ellu averà à manghjà. Ma quandu u saccu sarà viotu… Dirò che san Cristofalo era un nano.
Vale à dì, spieca torna Farrandu Ettori : sò prontu à e bucìe e più grosse. A spressione hè pruverbiale in italianu, compie Farrandu Ettori. •
