Arritti, cari lettori, vi manda l’auguri aldilà di l’anni… eccù quì una puesìa ch’avemu truvatu di Ghjuvan’Ghjaseppu Flori, dettu Peppu Flori. Era un pueta è scrivanu corsu natu in u 1898 in Aiacciu. Ma era niulincu, di u paese di Lozzi. Peppu Flori hà scrittu artìculi nant’à a stampà di l’èpica, libri, ma ancu canzone. È cantava anch’ellu, truvèndusi à cuntrastà per e veghje o e fiere, cù d’altri pueta famosi cum’è Pampasgiolu (Ghjasepppu Giansily). Cusì hà urganizatu una merendella à prò di a nostra lingua è a nostra cultura, in Calacuccia di lugliu 1960, cù scrivani è pueta di l’èpica.
Salutemu cù elli è tutti quelli chì tramàndanu a nostra lingua è a nostra cultura cù u so impegnu tamantu per mantene viva a nostra identità.
Peppu Flori s’hè spentu in Aiacciu in u 1972 à l’età di 74 anni.
Pudete truvà un bellìssimu riportu nant’à a so vita è a so òpera in ssu leame cù belli testimogni è magnìfiche fiure di l’èpica : https://isula.forumactif.com/t798-peppu-flori-l-anima-di-una-cultura •
Bon Dì è bon Annu !
Possa, l’annata nova, dacci à tutti
A Pace… a Salute… è la Ghjustizia…
Perchì lu mondu si sparti li frutti
Chì la Natura porghje incù divisia !
Chì dumane, per tuttu l’Universu,
Ch’ellu ùn ci sìa più schiavi è rimiti…
Ne più pudenti, guardà di traversu
Li pòveri chì sò scalzi è famiti…
È senza fà rinchjini, ne manere,
D’ùn vede più ne odiu, ne vergogna…
Ne bracce stese per pienghje
o per chere,
Ch’ognunu trovi ciò chì l’abbisogna…
Chì l’orgogliu sparisca in sempiterna,
Ch’ellu ùn ci sìa più dèbuli è forti…
Ma una società para è fraterna,
Senza spende favori, ne fà torti…
Ch’ellu sì sbatilisca frà l’Umani,
L’intesa onesta è la franca cuncordia…
È chì Dìu sumenga à duie mani,
Grazie… Perdonu… è Misericordia…
È cusì sìa ! •
Peppu Flori.
