Pierrot Susini s’hè spentu stu 7 di dicembre 2025 à l’età di 80 anni. Dorme per sempre in a so cara terra fiumurbaccia. Cù ellu, ghjè un pocu di a nostra stòria chì si ne và.
Cert’omi simbulizèghjanu elli soli un pezzu di stòria cullettiva. Pierrot Susini era di quessi. Puru, ùn ne dumandava tantu ! Umile, fidu, curagiosu, sulidariu, sempre prontu à dà u colpu di manu, avìa u sensu di l’amicizia è a passione di a Corsica. Quellu 22 d’aostu di u 1975, Edmondu avìa dumandatu. Ellu, avìa rispostu. Averebbe pussutu perde a vita, l’averebbe data senza sturzulà. Hà persu un pede, è ùn s’hè micca lagnatu. Era u prezzu crudele di l’impegnu. U prezzu per sveglià cuscenza. « Ci vulìa à falla, l’aghju fatta » dicìa ùmile. L’assaltu di e forze francese chì vulìanu fà di a morte di ssi Corsi ribelli un esempiu, hè statu cortu, ma a vita di Pierrot n’hè stata ciambuttata è malgratu ellu, hè diventatu sìmbulu. Stu pede strappatu ci conta dapoi 50 anni à tempu a generosità è a rivolta, l’inghjustizia è l’impegnu veru.
Edimondu hè partutu dopu in prigiò è a lotta hà presu un antr’indiatura. Più nunda ùn hà pussutu esse cum’è nanzu. Nè pè a Corsica, nè per Pierrot.
Militente di l’ARC presente ind’è a cava, sarà cundannatu di ghjungnu 76 da a Corte di Sicurezza di u Statu à dui anni di prigiò attempati. Liccava torna senza lagnassi. È dapoi tandu hè statu di tutte e lotte, discretu ma presente.
Quandu a giuventù corsa s’hè vultata di pettu à a sorte inghjusta fatta à Yvan Colonna, tutt’ugnunu hà in mente Pierrot chì di manera spuntànea, pichjava cù a so canna, u matrale di ferrame di i CRS in Corti. Torna un sìmbulu forte di a lotta. Ellu, struppiatu, mezu à ssi giòvanni, mughjendu à l’inghjustizia, è chjamendu à a rivolta.
Oghje, Pierrot ci lascia un pocu di più urfanelli di st’èpica di dulore è di determinazione sparsa in Aleria. L’attori di tandu si ne vanu unu à unu à l’altru mondu. È ci làscianu eredi di una lotta da purtà più luntanu.
Pierrot era un testimognu è un sustegnu fidu di a lotta di u pòpulu. Tocca à noi à cuntinuala. Vicinu à tutti sunniava d’unione patriotta, sapìa ch’ella face parte di e suluzioni d’avvene. Presenza è savviezza, fecìa parte st’ùltimi anni di l’associu l’Anziani per l’avvene. Ùn hà piantatu sin’à l’ùltimu soffiu.
Arritti manda e so cunduleanze afflitte è fraterne à Barbara a so figliola, à u so fratellu Paulu, è à tutti i soi, parenti è amichi. Firmerà sempre in i nostri cori cù tant’altri patriotti sinceri ch’ellu hà ritruvati in celu. Riposi in pace o Pè. •
L’Umagiu di Femu a Corsica
Si n’hè andatu à l’Eternu Pierrot Susini, patriottu di e prim’ore, militante di l’ARC à fiancu à i fratelli Simeoni è tanti cumpagni di lotta. Dapoi l’evenimenti d’Aleria d’aostu di u 1975, duranti i quali fù feritu à u pedi, Pierrot viaghjava sempre cù a so crochja, sìmbulu d’un’indiatura purtata sin’à u sacrifiziu… ! Una mucatura ch’ellu hà tenutu longu à a so vita d’omu arradicatu à a so terra è in mossa pè a Libertà. Femu a Corsica manda e so cunduglianze afflitte à a so famiglia è à tutti i soii. Ch’ellu riposi in Santa Pace. •
