Rendìmuci contu di ciò chì si passa in Catalogna. Face 15 anni ch’elli sfìlanu di manera pacìfica millioni di Catalani in carrughju per chede u drittu di sceglie u so destinu. Quelli chì manifestèghjanu, ùn sò tutti indipendentista.
Vòlenu solu avè u drittu di sceglie. Ssu drittu à l’autodeterminazione hè universale.
Hè un drittu umanu.
Ùn sò caprici di qualchi elettu chì vulerìanu impone a so lege à u pòpulu catalanu per spiccalu da a Spagna. A settimana scorsa, dapoi ssu prucessu vergugnosu, sò centinaie di millaie di personi torna ch’anu marchjatu à traversu a Catalogna, certi fendu sin’à 150 chilòmetri à pedi, per sbuccà in Barcelona, è manifestà torna e so brame di libertà.
Ssu mare umanu impressiunante si ne parla pocu in i grandi mèdia televisii francesi. Cum’è s’hè parlatu pocu di e cazzuttate è batterchjate di a pulizza spagnola contr’à ghjente di tutte l’età, donne, vechji è zitelli cumpresi, per impedìsceli di vutà u primu d’ottobre 2017.
Ciò chì si passa in Catalogna ghjè una negazione di demucrazìa ch’ellu ci tocca à dinunzià.
U Populu catalanu in carughju, in Barcelona u 18 d’ottobre.
Per aiutà u pòpulu catalanu, ci tocca à manifestà noi dinù, di manera massiva, pacìfica è determinata. Ssa sulidarità per un pòpulu demucràticu hè un sustegnu à e nostre brame d’una Francia è d’un Auropa demucràtica. Hè una lotta contr’à e derive fasciste chì ci mènanu ancu à noi. Sìte cuncernati. Aiutàtevi, aiutendu i Catalani. Sola nostra sulidarità puderà scuzzulà l’Auropa di i Stati chì ci affoca, è ublicà a Spagna à u diàlogu.
In Aiacciu, Bastia, Corti, Nizza, Parigi, Tulusa, Pau, Lyon, Quimper, Rennes, Lille, Aix en Provence, Tulò, Marseglia, Montpellier, cum’è in parechje cità aurupee, nàscenu sse manifestazioni.
Cuntinuemu. Sulidarità Corsica Catalunya !
