« À l’alba d’un’annata impurtantìssima, a Corsica si trova à u crucivia di a so Storia.
In un cuntestu aurupeu è internaziunali di difficultà è d’incertezzi maiò chì tòccani dinò a Corsica, u nosciu Paesi è u nosciu Pòpulu sò cunfruntati à numarosi sfidi : ecunòmichi, suciali, ambientali, linguìstichi, culturali, sucitali, demugràfichi è demucràtichi.
A prima sfida di tutti hè quidda di riescia u prucessu trà a Corsica è u Statu.
L’annata di u 2024 devi essa quidda di l’autunumia è di a suluzioni pulìtica tantu bramati da i Corsi.
Dopu à 60 anni di lotta, dopu à guasgi deci anni di vittorii demucràtichi è di guvernu naziunali, dopu à 2 anni di discussioni trà a Corsica è u Statu aparti à u lindumani di l’assaltu murtali d’Yvan Colonna, semu à l’alba di a vittoria pulìtica.
U prucessu trà a Corsica è u Statu devi sbuccà, nanzu à a fini di l’annata, nantu à una revisioni custituziunali. Issa riforma di a leghji fundamintali francesi hè una tappa indispinsèvuli da cunsacrà è metta in òpara un statutu d’autunumìa chì hè a règula in Auropa è in u Mediterràniu, è una suluzioni pulìtica pà a Corsica.
Issu caminu custituisci un’opportunità stòrica da cunducia u Pòpulu corsu nantu à a strada di a vita, di a sperenza è di l’emancipazioni.
Issu caminu ci devi purtà à francà un passu maiò è à apra un capìtulu novu di a noscia Storia : quiddu di a missa in òpara di u nosciu prughjettu di custruzzioni è d’emancipazioni naziunali, di spannamentu è di prusperità pà u nosciu Pòpulu, d’edificazioni d’un sviluppu ecunòmicu pruduttivu è d’un mudelu suciali ghjustu.
L’autunumia, ghjustificata da i fatti isulanu, stòricu è demucràticu, sarà u fundamentu chì ci parmittarà di custruiscia u Paesi di i nosci sogni è di fighjulà l’avvena incù cunfidenza, di modu sirenu è rispunsèvuli.
Di pettu à issa sfida tamanta, ùn avemu micca u drittu di fiascà. Fiascà vinarìa à minaccià u pòpulu corsu in a so essezza. Fiascà vinarìa à impediscia u rigulamentu pulìticu di a quistioni corsa. Fiascà vinarìa à favurizà u conflittu è à cumprumetta a paci.
Di pettu à issa sfida tamanta, avemu u duveri di riescia. È a rièscita ùn hè mai stata cusì vicina. A rièscita ci porghji a mani.
Pà a prima volta in a storia di l’istituzioni di a Corsica, a deliberazioni « Autonomìa » di u 5 di lugliu scorsu, aduprata à 73 % di l’Assemblea di Corsica, traduci a brama maghjuritaria di u Pòpulu corsu è di i so raprisintenti pà un statutu d’autunumìa è una suluzioni pulitica pà a Corsica. Pà a prima volta in a storia di i rilazioni frasturnati trà a Corsica è u Statu, u Presidenti di a Repùblica s’hè dittu, duranti u so discorsu à l’Assemblea di Corsica u 28 di sittembri scorsu, à favori d’una riforma custituziunali da ricunnoscia un’autunumìa di a Corsica.
U cuntinutu d’issu statutu d’autunumìa devi pruceda d’un accordu pulìticu in Corsica è in Parighji.
A stonda chì c’aspetta in i mesi à vena hè forsa una di i più impurtanti di a noscia Storia ughjinca.
Di pettu à issa sfida tamanta, Femu a Corsica :
- 1.Dichjara chì, à nomu di a lotta stòrica di u Pòpulu corsu, à nomu di u nosciu ideali è di u nosciu prughjettu pulìticu, è à nomu di u rispettu di a demucrazia, l’accordu pulìticu à custruiscia si devi fà à pàrtesi da a deliberazioni « Autonomìa » vutata u 5 di lugliu à 73 % di l’Assemblea di Corsica.
Tandu, l’accordu pulìticu è u statutu à nascia sarani à l’altezza di l’imbuschi :
– Parmetta a salvezza è u spannamentu di u Pòpulu corsu in terra soia ;
– Dà à a Corsica è à i Corsi i strumenti da ammaistrà u so destinu è i mezi da risponda à i prublema d’ogni ghjornu è à i sfidi à longu andà, in i duminii ecunòmichi, suciali, ambientali, culturali, linguìstichi, sucitali, demugràfichi è demucràtichi.
– Arrigulà un cunflittu di 50 anni pà l’èpica muderna, arradicà a paci in u nosciu Paesi è scriva una pàghjina nova di i rilazioni trà a Corsica è a Republica francesi, fatti di rispettu è di ricunniscenza mutuali.
- Piglià l’ingaghjamentu – par vìa di a so Ghjunta – d’andà à u scontru di u Pòpulu corsu, urganizendu in i mesi à vena una mossa militanti maiò da scambià incù i Corsi di l’ìsula è di a spadduzzera, da impastà è da arradicà u so prughjettu nantu à u tarranu (giri citadini è paisani, cuntrasti di l’Autunumìa, cìcculu di cunfarenzi è riunioni pùblichi, accolti militanti, fori pulìtichi è piazzi pùblichi, azzioni d’affissera…).
- Piglia l’ingaghjamentu – par via di a so Ghjunta – di scuntrà l’insemi di i forzi patriòttichi (muvimenti, partiti, urganizazioni è associi), di i forzi pulìtichi è di i forzi vivi di a Nazioni, in Corsica è fora di l’ìsula, da favurizà, par via di u cuntrastu demucràticu, l’avenimentu d’un accordu pulìticu u più largu pussìbuli.
- Rinnova a so cunfidenza è u so mandatu à u Presidenti di u Cunsigliu Esecutivu, Gilles Simeoni, à u so Guvernu, à a maghjurità tarrituriali « Fà Populu Inseme » è à i so raprisintenti in Corsica, in Parighji è in Brussella, da custruisca un accordu pulìticu à un liveddu stòricu.
- Chjamà l’insemi di i forzi pulìtichi è di i forzi vivi, in Corsica, in Francia è ancu à l’adilà, à u spìritu di rispunsabilità è à u sensu di l’intaressu ghjenerali è di u bè cumunu.
Pà a storia, pà l’avvena,
Pà i ghjenerazioni d’eri, d’oghji è di dumani,
Pà a Corsica, u so Pòpulu, a so ghjuventù.
Autunumìa è Suluzioni pulìtica ! » •