À rombu di dilla, a parulla diventa sonniu, o puru pare alluntanata da i penseri oghjinchi di a ghjente. Chì ghjè l’autunumìa ch’elli s’intèstanu à ripete dapoi 30 anni* avà l’autunumisti ?
Prima di tuttu, un antra andatura. Svègliesi a matina è sèntesi parte d’una vuluntà cumuna. Esse Corsu frà i Corsi è prontu à fà pè a Corsica. Francassi da i vechji riflessi addurmintenti : ùn aspettà più i servizii chì pàrenu caccià i penseri è fà piglià l’accurtatoghji per avè un postu quì, un documentu aministrativu senza fà a coda, una pensione chì ci rivene di tutta manera, una suvvenzzione più grassa chè u vicinu ; ma, ch’in fatti, ci avvilìscenu pocu à pocu, ci rèndenu corci è mischini è s’arrùbbanu a nostra dignità.
L’autunumìa hè : tutti cuscenti ch’ellu s’avvanza tutti inseme, è pronti à accettanne e règule. L’autunumìa hè rispunsabilisazione. L’autunumìa hè azzione. L’autunumìa hè custruzzione cullettiva, in cuscenza è in partecipazione sulidària è ghjusta.
À u livellu ghjurìdicu, ghjè trasferimentu di e cumpetenze chì ci cuncèrnanu. Vale à dì, simu noi chì sapemu ciò ch’abbisogna u nostru avvene. Simu noi chì mettimu in piazza l’arnesi ch’ellu ci vole, e decisioni necessàrie à l’oghjincu, è chì seguitemu l’appiicazioni di sse misure messe in òpera cù i nostri soldi cumuni. Simu noi chì femu e legge è noi torna chì andemu à discute incù Brussella o urganìsimi internaziunali di ciò chì dipende di l’interessi di a nostra terra.
L’autunumìa ùn hè micca qualcosa di foscu chì si vede cusì à pocu pressu da luntanu. Hè più vicina chè a punta di u nostru nasu ; sè no a vulemu. Ùn hè nemancu qualcosa di diffìciule è cumplicatu da mette in ballu. Innò, d’altri a ci l’anu fatta, è bè ! È e cose viàghjanu in pochi anni ; sè no a vulemu.
In fatti, l’autunumìa hè una rivuluzione di e mentalità per mètteci nentru ciò chè no vulemu di cullettivu è di benfattu pè a Corsica. Basta à vulella. •
F.G.
* artìculu publicatu ind’è Arritti in 1997