Natu in Loriani di lugliu di u 1745, Pace Maria Falconetti ùn avìa chè 10 anni quandu Pasquale Paoli hè statu elettu Capu Generale à a Cunsulta di Sant’Antone di a Casabianca, u 14 di lugliu di u 1755.
Pace Maria era un ardente patriottu ch’hà cumbattutu à capu d’un gruppu di resistenti corsi dopu à a disfatta di Ponte Novu di pettu à i suldati di l’armata di u rè di Francia.
L’èpica era dura è à traversu l’esempiu ch’ellu hà datu ss’omu, si pò imaginà tutte e suffrenze ch’ellu ci hè statu in ssi tempi di ripressioni è di viulenza. Quantu Pace Maria sò stati cusì scurdati da a nostra stòria ? Quant’inghjustìzie, quantu disprezzu, ssa ghjente hà suffertu ? Quant’amore dinù, quant’impegnu, quanta resistenza anu oppostu i Corsi pienghjendu i 14 anni d’indipendenza è di rivuluzione paulista ?
Ammentassi di Pace Maria Falconetti, hè una manera di rende umagiu à tutti st’omi chì si sò offerti in sacrifiziu per difende a libertà.
L’8 d’aostu, Cambia s’appronta à unurà ssu patriottu ammentendu u 250u anniversariu di a so morte in esiliu in e prigiò tremende di Tulò.
À cinqu’ore dopu meziornu, una placca serà inaugurata piazza di a ghjesgia.
Pò ci serà una cunferenza di Ghjuvan’Petru Poli, avucatu è scrivanu, nant’à a vita di Pace Maria.
À 7 ore, una messa sera detta è infine, à 8 ore un pranzu aperitivu serà offertu da a municipalità.
Aspettendu, u nostru amicu Norbertu Pancrazi, hà scrittu ssu bellìssimu cantu ch’omu puderà sente l’8 d’aostu in Cambia.
Venite nuamarosi à rende onore à a nostra stòria in ssu tricentinariu di a nàscita di Pasquale Paoli.
Pace Marìa
In tempi di revuluzione in Loriani nascìa
N’a pieve di Vallerustie u Falcu Pace-Maria
Avìa solu deci anni quandu lu gran’Pasquale
À u Cunventu d’Ampugnani fù elettu Generale
Di u statu paulistu n’hà vistu a custituzione
Per un pòpulu arrittu cù’a Madonna in cumunione
A muneta, una truppa, sott’a bandera d’unione,
L’università in Corti, capitale di a Nazione
ripigliu 1
O Eroe silenziosu,
A pàtria ti deve tantu !
Cum’è un leone gluriosu,
Curagiosu è core in fronte,
Ai incesu trà mar’è monte,
Un fanale mai spentu.
Eppò ghjunse a battaglia di Ponte Novu è a disfatta
Ma’ùn ci vulia à pattighjà, a resistenza era nata
U Falcu pigliò a machja, sicuru di a so ragione
Suminendu a rivolta in giru à lu San Petrone
Capifila d’una milizia di trenta trè patriotti
Da Sionville ricircatu, u più timutu di tutti
In Castagniccia assighjava quella armata reale
Chjappèndula’in l’imbuscata, pè i monti è pè e valle
ripigliu 1
O Eroe silenziosu,
A pàtria ti deve tantu !
Cum’è un leone gluriosu,
Curagiosu è core in fronte,
Ai incesu trà mar’è monte,
Un fanale mai spentu.
Grazi’à Clemente De Paoli, è i Corsi forusciti
Francò u mare terraniu per piglià e munizioni
In a Tuscana alliata à quella truppa d’umoni
Chì facciu à i nemichi schersi èranu li mezi
Brusgionu case è paesi per scaccià quelli « banditi »
È certi Corsi intimuriti, i soi l’anu traditi,
Minacciatu è affanatu dopu à tamanta battaglia
Sì rendì Pace-Maria press’à u Vescu d’Aleria
Cù a prumessa di vita, in Bastia fù imbarcatu
Ma in galera di Tulò, scalivatu è sbandunatu
U bruttu scorbiu chjappò, trà muraglie è marciume
Murì n’un ùltimu fiatu u Ribellu privu di lume
ripigliu 2
Pace Maria in memoria
Oghje fiurisce a to gloria
Viaghjadore di u sperà
Serai per l’eternità
Cù i to cumpagni di lotta
U Falcu di a Libertà !
fine
Pace-Maria, Pace-Maria !
en alternance avec Chœur
Requiescat in Pace. •
