Hè un bellu ghjornu di festa stu 5 di maghju di u 1992.
In Bastia, l’estate hè ghjunta in avanzu. Face u caldu è ùn si parla chè di quessa. A frebba era digià cullata dapoi l’eliminazione di Toulouse, di Nizza in casa soia, è di Nancy.
A Corsica sana hè in Furiani per sustene u chjuculettu Sporting chì hà riesciutu à alzassi sin’à a mezafinale di cuppa di Francia contr’à Marseglia. Semu cascati in l’anonimatu di la « Division 2 » ma sta sera hè a nostra rivìncita. In cità, sò bandere ogni locu, nant’à ogni vittura un frisgiu turchinu è biancu. Hè a moda tandu.
Hè un’ora. Più nimu pò aspettà. Andemu in Furiani. U bigliettu in Est, a tribuna a menu cara, costa 120 franchi. Ùn ci hè micca « demi-tarif ». Ùn face nunda, hè l’OM, hè una mezafinale di cuppa. Semu in prima pàgina di L’Équipe chì hà messu in tìtulu « Bastia-OM de feu ». Ùn saperemu mai ciò ch’ella hè diventata a ricetta.
Sò duie ore, ci hè troppu mondu chì aspetta l’apertura di Furiani. E porte s’àprenu più prestu ch’è prevista. L’antica « Tribune Est » s’empie in quattr’è trè sette. Hè digià piena à tappu. L’attesa hà da esse longa.
Sò quattru ore. Face u caldu in « Est ». Avemu fattu bè di vene prestu, a tribuna hè digià piena. Quelli chì ghjùnghjenu avà i fàcenu cullà in cima di a « Nord », a tribuna custruita à posta pè u macciu.
Sò cinque ore. Ghjùnghjenu Thierry Roland è Jean-Michel Larqué. Passeranu un bruttu mumentu.
Sò sett’ore è mezu avà. U stadiu sanu hè pienu à tappu. Ci sò stati l’azzuffi cù l’ultrà di l’OM, parchegiati da u cantu sud-ouest di u stadiu. Duranti un mese ci hè statu una pulèmica à u forum di RCFM per sapè s’elli avìanu da avè biglietti per u macciu o nò. Finalmente sò quì.
Sò ottu ore menu un quartu. Ùn avemu micca vistu i ghjucadori entre, troppu fumigeni. I ghjucadori sò entrati pè u scaldamentu in un trostu d’infernu. Si pesa a nebbia, pocu à pocu i scupremu. Sò tutti quì : Mozer, Boli, Papin… Sò i campioni di Francia, finalisti annu passatu di a cuppa d’Auropa di i campioni, è noi ùn semu nunda. È ci sentimu più forti ch’è elli.
Più luntanu, sott’à a Ouest, si scàldanu i nostri : Mangione, Difraya, Valencony, Bianconi… Sapemu chì quandu Furiani hè cusì, l’altri ùn puderanu fà nunda. Mai più camperemu un’ambianza sìmile. Mancu Tapie pare tantu rassiguratu.
Sò ott’ore è diciottu. I Chjami Aghjalesi venenu di cantà unepoche di canzone chì anu fattu cresce torna appena di più l’ambianza. « Catena », « Populu Vivu »… era impressiunante cù tutte e bandere turchine è quelle bianche cù a testa di moru chì sventulàvanu. Semu parechji à avè a carne pullina.
Sò ott’ore è vinti avà. Aspettemu. E duie squadre sò in i spugliatoghji. Chì dicerà René Exbrayat, l’intrenore di Bastia ? L’ambianza hè calata appena. U calmu nanz’à a timpesta. Aspettemu.
Era 29 anni fà.
Si sente un rimore inabituale. Cum’è un fischju d’una bomba chì si ne fala. Una parte di a tribuna pruvisoria stallata à posta pè a partita s’hè sprufundata. Era colma di ghjente. U core di a Corsica sana s’hè arrestatu di batte.
Avà, ùn ci hè più ch’è silenziu. Era 29 anni fà. Hè u nostru dolu. Solu u nostru. Ci dìcenu ch’ellu ùn hè micca quellu u futbol francese. •