Trenta dui anni dopu, l’OM vene d’immurtalizà u ricordu di a catastrofa di Furiani è l’umagiu ch’omu deve à e vìttime. Sta dumènica 12 di maghju, nanzu à l’ùltimu scontru in Marseglia di a stagione di Lega Unu, l’OM contr’à Lorient, una ceremònia hè stata urganizata à u stàdiu Orange Velodrome. Èranu presenti rispunsèvuli di u club marsegliese frà i quali u presidente Pablo Longoria, raprisententi di u Cullettivu di e vìttime di u 5 di maghju 1992, è di l’associu Sporting Bastia 92 ch’adunisce anziani ghjucatori.
« Simu quì per unurà e famiglie, è voi e vìttime, ghjè impurtante pè u club è pudete cuntà annant’à noi. Micca scontri un 5 di maghju » hà dettu Pablo Longoria.
Ssu passu vene in sèguita à un partenariatu firmatu u 5 di maghju scorsu trà u Cullettivu, l’associu Sporting Bastia 92 è Treizième homme, l’associu di sustegnu à u club marsegliese.
Hè un mumentu impurtante, un pocu tardivu, ma ciò chì conta oghje ghjè a sensibilisazione di u pùblicu, frà u quale i più giòvani, à ciò chì s’hè passatu una sera di maghju 1992 pè a vita di millaie d’omi è di donne.
Un pannellu hè statu scupertu è serà appiccatu ind’un spaziu dedicatu à a catastrofa per rende umagiu à e vìttime è fà chì stu drama ùn accade mai più.
Un filmu fattu da Pasquale Paumier hè statu diffusatu nant’à i scrini di u stàdiu chì conta cum’ella s’hè compia a gioia d’un pòpulu in un fracassu è un dulore cullettivu tremendu, dice Pasquale Paumier ind’è u filmu…
« Simu cummossi assai. Hè u primu club chì crea un spaziu dedicatu à a tragedia di Furiani. Hè assai impurtante per noi, Cullettivu di u 5 di maghju, u pòpulu corsu è u pòpulu marsegliese sò uniti ind’è ssa tragedia, a più grande di u sport francese. Ci hè vulsutu quantunque 32 anni… » hà dettu Vanina Guidicelli pè u Cullettivu di e vìttime ch’hà salutatu u sustegnu determinante di u presidente Longoria.
U partenariatu trà l’OM è u Cullettivu di u 5 di maghju aiuterà à mantene a memoria di a catastrofa è à porghje una riflessione nant’à ssu drame è e so cunsequenze. •