Hè natu un associu novu in giru à u skeubeu… Sporting Bastia 92 adunisce ghjucatori è ghjurnalista di quell’èpica. Ma hè apertu aldilà per ghjòvani o menu ghjòvani appassiunati, da sparghje a memoria di ssa generazione di ghjucatori, in u ricordu è u rispettu di quelli ch’ùn ci sò più, ben intesa, ma dinù ammentendu mumenti più belli nanzu à a catastrofa, è u travagliu di ricustruzzione paziente fattu dopu à ssa ferita tamanta… Di chè dassi di più forza.
Serà forse un pocu di nustalgìa di – più chè ghjucatori – amichi ch’anu campatu mumenti magnìfichi inseme… Quand’omu i senti parlà ss’anziane glòrie di u skeubeu, chì vènenu inseme di creà l’associu Sporting Bastia 92, si sente ch’ellu hè una vuluntà di più, forse una manera dinù di riparà u passatu, di francà u drama – senza mai smenticalu – di fallu cunnosce altrimente. Parassi di e càuse tremende ch’anu adduluritu per sempre a Corsica, per fà sorge qualcosa di megliu, prutege ssu munumentu di a nostra stòria spurtiva, cuntallu à e ghjòvane generazioni, partecipà à ssa nova dimensione ch’ellu hà presu dapoi già qualchi annu. Cù a sucietà cuuperativa d’interessu cullettivu ch’ellu s’hè datu u club, cù l’associu i Socios ch’elli anu creatu è fàcenu campà di manera assai custruttiva i sustenitori di u Sporting, cù Memoria Turchina chì face a lea trà anziane è ghjòvane generazioni di ghjucatori, o di manera sucetale, fora di u campu spurtivu è cù una dimensione umana è pulìtica forte, cù u Cullettivu di e vìttime di u 5 di maghju 1992, mancava una dimensione di più in giru à u Sporting. Sporting Bastia 92 accolma ssa dimensione « riparatrice », quella di i ghjucatori è testimognii ch’anu campatu belle è gattive cose in ss’annate novanta. Dinù per elli, hè stata una catastrofa tamanta u drama di u 5 di maghju è ci hè vulsutu scumbatte nant’à u campu spurtivu per guarisce di ssa ferita. Forse hè ssa vuluntà di vita chì l’adunisce torna 30 anni dopu. Sò lee particulare chì sàldanu ssa generazione. Ma a so vuluntà vole francassi di a sola tristezza o nustalgìa d’un tempu. L’associu hè apertu à tutti, anziani o più giòvani, u scopu essendu di rinfurzà u Sporting amentendu ssa dimensione stòrica è sopratuttu u mentale è a forza ch’ella li dà.
State attenti à i so pròssimi appuntamenti.
Forza Bastia ! Forza a nostra stòria ! •