Le Secours Populaire français hè natu 80 anni fà à a fin’di a seconda guerra mundiale. Dopu à a Grande Guerra, in u 1920, nasce u Secours Rouge, muvimentu internaziunale di militenti cumunisti frà altri chì crèanu a sezzione francese cù antifascisti è intellettuali. Scumbatte contr’à u culunialìsimu, sustene l’impiecati, i prigiuneri pulìtichi, lotta contr’à a pena di morte è u razzìsimu.
In u 1938, si dà un mottu : « Tuttu ciò ch’hè umanu hè nostru » chì ferma sempre u so slogan oghje. Scumbatte contr’à a guerra di Spagna à u latu di i Republicani è s’impegna per l’accolta di i refugiati.
Durante a seconda guerra mundiale, u muvimentu hè interdettu da u guvernu Daladier in u 1939 è i so militenti èntrenu in a Resistenza. A metà seranu fucilati o dipurtati da i nazì. À a liberazione, quelli chì fèrmanu s’impègnanu pè u ritornu di i prigiuneri di i campi di cuncentrazione. In u 1945 nasce in ssu filu u Secours Populaire Français cù a fusione di l’associu naziunale di e vìttime di u nazìsimu è u Secours Populaire de France.
Oghje u Secours Populaire s’impegna in Francia cum’è in u mondu, per difende i più dèbuli, pòveri, migranti, vìttime di e dittature o di e catastrofe naturale. Aiuta i grevisti è e so famiglie di pettu à u grande patrunatu, è i più dèbuli frà tutti : i zitelli… In u 1970, fonda i Pères Noël Verts da permette à i zitelli di parte in vacanza. U Secours Populaire lotta contr’à a misèria, sparghje aiutu alimentariu, porghje sustegnu per curassi, avè accessu à a cultura, ritruvà dignità è fede in a sucetà. Si rivendicheghja cum’è a parulla di i « senza voci ». Dapoi l’annate 80, hè dettu « associu naziunale d’educazione pupulare », è « associu d’utilità pùblica » à pàrtesi di u 1985. In u 1991, vince u labele « Grande càusa naziunale » è s’impegna di più in più pè i zitelli creendu u muvimentu Copain du Monde in u 1992. Conta oghje 664 cumitati per aiutà 4,1 millioni di personi in grazia à 90.000 benevulenti è 241 prugrammi.
U Succorsu Pupulare in Corsica hè statu creatu in u 1995 in Aiacciu, in 2006 in Bastia. Hà a so antenna aperta tutti i ghjorni in Aiacciu, 10 montée St-Jean, è in Bastia piazza di Les Monts in Lupinu. U so presidente hè Hyancinthe Choury. I scopi sò di « prutege » contr’à tutte l’offese è i malanni di ssa sucetà : urgenza climàtica, cunflitti, migranti, senza tetti… « accumpagnà » a ghjente in u bisognu da ch’elli pòssinu curassi, manghjà, truvà un alloghju, avè drittu à a cultura, à l’educazione, à l’acqua, à l’elettricità, à l’infurmàtica, à e vacanze… vale à dì « emancipà » è rende à sta ghjente « a stima di sè ». L’associu racoglie vestiti, panni, scarpi, piatti è materiale da tutte e mamme da spàrteli dopu ind’è e Boutik’Solidaires. 120 tunnellate di panni sò riciculati ogni annu in Aiacciu. Dapoi 20 anni, a Librerìa Sulidaria permette à tutti d’amparà à leghje è à truvà un spàziu di cunvivialità.
U Succorsu Pupulare in Corsica hè membru di u Cullettivu interassuciativu di Lotta contr’à e Sclusioni (CLE) di u Duttore Pernin è face veramente un travaglione.
Da ringrazialu. •
Infurmazioni : www.secourspopulaire.fr/20