Dapoi un annu s’hè custituitu un Cullettivu ch’adunisce tutti i difensori di e lingue regiunale in Francia. Alsazia, Brittagna, Catalogna, Corsica, Occitania, Paese Bascu, Savoia… anu cusì decisu trè mesi fà dopu à avè rimessu una lètterra à u Presidente di a Republica, d’urganizà una accolta simbòlica di fronte à i Retturati, in parechji lochi di Francia. U Cullettivu « Da ch’elle càmpinu e nostre lingue » prutesta contr’à a riforma Blanquer ch’affoca e nostre lingue, è rivendicheghja a so riccuniscenza à traversu un veru statutu. L’azzione cuncertata di u 10 d’ottobre hè stata una riescita in parechji lochi. Ghjè un antra tappa ind’è i passi francati inseme per parlà d’una voce sola è ghjunghje à fà capisce ch’ùn sò perìculi e nostre lingue, ma forza è richezze.
In Corsica, più di dui centu personi si sò adunite malgratu u cuntestu di u Covid. L’Associu di L’Insignanti di è in Lingua è Cultura Corsa (AILCC), l’Associu di i Parenti Corsi, u STC Educazioni, Parlemu Corsu, Praticalingua, ma dinù u Sindicatu di l’Insignanti di u Secondu Gradu (SNES), tutti membri di u Cullettivu, avìanu chjamatu à ss’adunita. I partiti naziunalisti dinù. Eletti di u Cunsigliu esecutivu è di l’Assemblea di Corsica èranu presenti, insignanti è parenti dinù.
Frà i cinque parlementarii naziunalisti ch’anu chjamatu ; u deputatu aurupeu, Francescu Alfonsi, u deputatu à l’Assemblea Naziunale, è Sicretariu Naziunale di Femu a Corsica, Ghjuvan’Felice Acquaviva, u Senatore di u Cismonte, Paulu Santu Parigi, éranu presenti. Dopu à parechji discorsi di u deputatu aurupeu è di i purtavoci di l’AILCC, Ghjiseppu Turchini, l’APC, Diunisu Luciani, è di u STC Educazioni, Ghjuvan’Petru Luciani, una delegazione hè stata ricevuta durante più d’un ora è mezu da a Rettrice di Corsica. A Rettrice hà riccunisciutu chì dapoi ch’hè stata messa in ballu ssa riforma, càlanu l’effettivi di lingua corsa, allora chè sinamente à avà, nigava stu fattu. S’hè ingagiata à trasmette e dumande di a delegazione ch’hè stata ricevuta : messa à livellu di a lingua corsa nant’à u statutu di e lingue anziane (cuefficente 3 è fine di a cuncurrenza cù d’altre ozzioni), rinforzu di a filiera bislingua, cù u scopu d’omancu una filiera bislingua in ogni cullegiu, cuntinuità di l’insignamentu bislingu trà i sfarenti cìculi d’insignamentu, trà u primariu è u cullegiu, è trà u cullegiu è u liceu, ripresa di e discussioni à u senu di e cummissioni permanente di travagliu, appiecazione di l’artìculu 7 di a lege 2002 à u cullegiu (offerta obligatoria d’insignamentu), infine, adopru è rinforzu di i trè pilastri per urganizà l’insignamentu di lingua corsa : strutturazione, evaluazione è furmazione.
Appuntamentu hè statu presu dopu à e vacanze di i Santi da dibatte nant’à tutti ssi puntelli è vede cumu fà avvanzà e rivendicazioni già per ciò chì tocca à e cumpetenze à u livellu di a Corsica. In quantu à u Cullettivu « Da ch’elle càmpinu e nostre lingue » hà da cuntinuà a so lotta cumuna à tutte e lingue regiunale (leghje u nostru articùlu : « Des dizaines de rassemblements partout dans les régions »). Serà ricevutu ind’è pròssime settimane à u Ministeru di l’Educazione Naziunale. •
[huge_it_slider id= »2″]
