Parechje millaie di personi anu sfilatu in Corti pè u ritornu in Corsica di Petru Alessandri è Alinu Ferrandi.
Malgratu a crisa sanitaria, sò parechji à avè rispostu à a chjama di l’associu L’Ora di u Ritornu è di a Lega di i Diritti di l’Omu chì dumàndanu a livata di u statutu dettu DPS ch’impedisce u so avvicinamentu, ma dinù a so liberazione cundiziunale, postu chì, secondu à u drittu francese, i dui prigiuneri sò liberèvuli dapoi u 2017. In 2022, serà u casu dinù di Yvan Colonna. Ssa dumanda hè sustenuta di manera unitaria da u muvimentu naziunale, ma dinù da a dritta à a manca, postu chì una muzione hè stata aduprata à l’unanimità da l’Assemblea di Corsica.
« Sta mubilisazione hè una tappa impurtante chì hà da cunfurtà a leghjittimità di l’eletti quand’elli s’addirizzeranu à u primu Ministru è à u presidente di a repùblica » hà dettu André Paccou di a Lega di i Diritti di l’Omu.
« E mubilisazioni anu da cuntinuà. A cundanna hè stata appiecata più ch’ellu ci vulìa, oghje hè tempu ch’ella compie, per elli, per noi, pè a Corsica, pè a ghjustizia è à nome di i diritti di l’omu » hà dettu Simon’Paulu Ferrandi per l’associu L’Ora di u Ritornu.
Hè stata letta una lèttera mandata da Petru Alessandi è Alinu Ferrandi. Èccula quì.
« Vi mandemu un salutu fraternu. A nostra fede hè tamanta di sapè vi oghji quì per fà fronte à l’inghjustizia.
Vulemu mandà dinù a nostra fratiddanza à quiddi in Francia, in Borgu, patriotti sinceri privi di libartà è bramosi di ritruvà i soi. A ghjustizia in Francia hè particulara par nò Corsi. Dopu à 22 anni di prighjò, u guvernu Castex hà sceltu di mantena ssu statutu di DPS di manera à tèneci luntanu da i nosci famiddi, da i nosci amichi, da i nosci lochi, è par quantu tempu dinù.
Ssa decisioni và à contru sensu di i raporti d’evalutazioni di i sperti è semu di pettu à una ghjustizia pulìtica. Ma ùn semu micca urfaneddi. Semu i fidoddi di ssa tarra, è a vostra prisenza oghji ci dà a forza è u curaghju.
Ssa mossa hè una risposta à ciò ch’elli chjàmani « troubles à l’ordre public », par chì pinsàvani chì dopu à 22 anni d’asiliu sarìamu spatriati par l’eternu. Nò, vulemu vultà in tarra noscia. Allora, o ghjenti, femu fronti tutti insemi. Per luttà contr’à l’inghjulia, avemu bisognu più cà mai di u vosciu impegnu per francà i muri di l’inghjustizia è fà rispittà i nosci diritti di vulè campà in tarra noscia.
È una sola parolla : libartà ! » •
[huge_it_slider id= »4″]
