Allora chì i putenti di a pianetta disciulèghjanu in Glasgow preoccupèndusi di cumu mantene u so mondu di scimizia invece di mette in ballu e misure indispensèvule per dà di pettu à u riscaldimentu climàticu, a ghjuventù di u mondu sanu hà lampatu una chjama à i participenti di a COP26. Greta Thunberg di Sueda, Vanessa Nakate d’Ouganda, Dominika Lasota di Pologna, Mitzi Jonelle Tan di e Filippine, si sò indirizzate à i dirigenti di u mondu per fà sente a voce di e nove generazioni è di quelle à vene. I raporti di l’esperti mundiali sò di più in più gattivi, e cunsequenze ci u ciambuttamentu climàticu di più in più tremende, ma più ci volerebbe agisce, è più i guverni mundiali ùn ghjùnghjenu à mèttesi d’accordu. « A mo speranza, hà dettu Greta Thunberg, hè arradicata ind’è l’azzione è si nutrisce di l’amore per l’Umanità è a nostra bella Terra. Ghjè ciò chì mi cunvince assolutamente chè no pudemu fà. È chè no duvemu fà inseme. »
Eccu ssa chjama di a ghjuventù chè vo site chjamati, voi dinù cari lettori d’Arritti, à ziffrà :
« Tradimentu. Eccu cumu a ghjuventù mundiale vede u fiascu di i guverni à limità l’emissioni di carbone. È ùn hè una surpresa. Simu di manera vertiginosa luntani da l’obbiettivu decisivu di limità u riscaldimentu à 1,5 gradu, è malgratu què, i nostri guverni impe-ghjurìscenu a crisa climàtica frazendu milliardi ind’è l’energìe fussile chì ne sò a càusa. Ùn avemu più tempu à perde, ghjè un alerta rossa pè a Terra. Millioni di personi anu da soffre allora chì a nostra pianetta si strughje – hè un avvene spaventosu ch’hà da divente rialità, o pò esse scunghjuratu, si dipende di e decisioni chè vo avete da piglià. Avete u putere di decide.
In tantu chì citatini ghjunti da tutta a pianetta, vi dumandemu di dà di pettu à l’urgenza climàtica. Micca quist’annu chì vene. Micca u mese pròssimu. Oghje.
– Salvate u scopu centrale di 1,5 gradu sminuendu sùbitu avà l’emissioni annuale, più fermu chè mai.
– Piantate sùbitu avà l’invistiscimenti ind’è l’energìe fussile, dinù e suvvenzioni, i novi prugetti è l’operazioni di splurazione è scavature.
– Fàtela finita cù i bilanci carboni burladori publicati cù u tutale di l’emissioni di tutti l’indizii di cunsumazione, di e catene di pruvista, di u trasportu aèreu è marìttimu internaziunale è di sutterramentu di a biomassa.
– Tenite a prumessa di 100 milliardi di dòllari pè i paesi i più vulneràbile cù fondi in più pè e catastrofe climàtiche.
– Assicuràtevi chì e vostre pulìtiche climàtiche prutèginu i travagliadori è e personi è più dèbbule sminuendu tutte e forme d’inugualità.
Pudemu sempre ghjùnghjeci. Hè sempre tempu d’evità e peghje cunsequenze sè no simu pronti à cambià. Ci vole una determinazione ferma è un curagiu pulìticu immensu, ma quand’è vo rispunderete presente, sò milliardi di personi chì saranu cù voi. Sinceramente. »
À u mumentu di stampà Arritti, èranu più d’un millione trè, i petiziunarii… è e ziffre s’aghjustàvanu tutte e cinque seconde. Voi dinù, ziffrate è fate ziffrà a petizione (avaaz.org), sustenite a ghjuventù di u mondu sanu. •