« À l’altru mondu, u tempu hè longu, ci stà l’eternità,
È m’hà pigliatu à tempu natu, di mè chì n’hà da fà ? »
Ci pare sente a voce dolce, calda è languida di Stèfanu Casalta sussurà stu bellìssimu cantu, forse unu di i più belli di i canti corsi offerti da i fratelli Vincenti. Quantu volte l’hà cantatu ss’artistu creativu, ùmile è sensìbule ? Oghje, per disgrazia, sse parulle sò scritte per ellu è pè i soi per mai ind’è l’afflittu, addulurendu a Corsica sana è stringhjendu i nostri cori à u sguardu di a videò ch’ellu avìa fattu cù a so sposa Rosela Libertad, ella à a voce, ellu à a ghitarra accarizèndune e corde. Chì talente per trasmette l’emuzione !
Stèfanu Casalta si n’hè andatu senza prevene à nimu à l’età di 56 anni, stu 27 d’aostu. Arritti ferma à fiancu à i nostri amichi cari, u so babbu è a so mamma, Toni è Mimi Casalta, a so figliola Lucìa, a so moglie Rosela, u so fratellu Dumènicu, u so zìu Francescu Agostini, tutti i parenti è l’amichi chì u piènghjenu.
A so pèrdita lascia un viotu tremendu in u mondu di a mùsica corsa, è ancu aldilà di e fruntiere di l’ìsula, in Italia vicina, Italia surella, per quale bramava ellu di ritesse e lee di cultura cumuna. « Ùn si pò cuncepisce u cantu corsu s’omu ùn allarga micca a so surgente, vale à dì s’omu ùn cunsidereghja micca l’altre surgente di u Mediterràniu. Simu à tempu un pocu sardu, un pocu d’Àfrica di u nordu, un pocu di Grècia, un pocu di u sud di a Francia, simu un cuncentratu di tuttu què finalmente, a fraternità trà e mùsiche hè ciò chì ci deve avvìa » testimugnava Stèfanu qualchi annu fà. « A mùsica ùn hè micca una scelta, ghjè qualcosa ch’avemu in fondu di sè è ch’ùn pudemu ignurà. Per mè cantà ghjè vitale. »
È cusì, ùn avìa 12 anni ch’ellu cantava digià sunendu di ghitarra cù u prestigiosu gruppu a Filetta. Dapoi tandu hà campatu di a so passione, firmendu ssu creatore chì và à circà sempre più luntanu l’armunìa è a dulcezza di l’accordi, e lee trà culture latine, forte d’una musa lìbera è aperta. Ci purtava in viaghju Stèfanu. Da Giramondu à Magicanima, passendu per Animantiga è Canti à Lucendiluna avìa sempre in core ssa ricerca di creazione è di trascendenza cumuna. Era un artistu veru, pueta, musicante, interpretu, è forte di 40 anni di creazione è d’un inspirazione in bullore, avìa da pòrghjeci tantu è tantu belli prugetti tinti di cultura è d’umanità. U destinu n’hà decisu altrimente.
Stèfanu era dinù un figliolu, un babbu, un maritu, un fratellu, un nipote, un amicu ch’omu pienghje oghje è à i quali Arritti manda cunduluenze afflitte è fraterne. Riposi in pace schieta, o caru Stè, tù chì sì andatu à scopre l’altru mondu da diventà stella…
« Ùn piglià dolu, u to figliolu cù l’anghjuli stà bè.
È ciò ch’o vogliu, u mio custodiu a sà prima cà mè.
Quì l’aria fine cum’è puntine cosge senza piantà,
Ore tranquille, à mille à mille, senza calamità.
À l’altru mondu, canta un culombu è paura ùn ne hà,
Per cacciadore ci hè u Signore, O Mà ùn ti ne fà… » •
