« Ùn l’aghju mai detta à nimu ma sta canzona l’aghju scrittu per ellu »… hà palisatu Patrizia Gattaceca parlendu di u so amicu Yvan Colonna pè u quale hà scrittu « Senti a filetta ». Bellìssima puesìa chì l’averà datu un pocu di fiatu trà i quattru muri di a so prigiò, l’averà fattu viaghjà in i so sogni… à ritruvà a so machja. È a filetta. Riposi in pace o Yvan.
Sposalu stu silenziu
Scialba sti muri vioti
A fiure isulane
Imbotrati di celi è d’onde è di fureste
Chì u ventu petina.
Di muschi machjaghjoli à u spunta di l’albe
Quand’ellu si sbucina u tempu d’una stagione
Di muschi machjaghjolu à u spunta di l’albe
Quand’ella si cincina a folla a to canzona.
È senti a filetta
È senti a filetta.
Dimmi un pezzu si stonda
Quandi a notte desta u ventu
À tiru d’alle fà batte un tempurale
In li mio sensi accesi
È nascenu mille fole in volu versu tè
Inventami u ricordu tessi sin’à noi
Cum’ellu ingrandi lu portu à l’ora di a luna
Inventami u ricordu tessi sin’à noi
Cum’ellu ingrandi lu portu à l’ora di i sogni
È senti a filetta
È senti a filetta. •