Un annu fà… digià !….. u primu guvernu naziunale dapoi Pasquale Paoli, ghjunghjìa à e rispunsabilità di a Corsica. Dopu à a tamanta festa ind’è a nuttata di u 13 di dicembre 2015, tutt’ugnunu si truvava à l’Assemblea di Còrsica, u 17 di dicembre, per l’elezzione di u presidente di l’Assemblea di Corsica è di i novi membri di l’Esecutivu territuriale. Mumentone carcu à emuzione ! È cum’è i naziunalisti ùn fàcenu nunda cum’è l’altri, pè a prima volta, a maghjurità hà urganizatu una ceremonia inedita : u ghjuramentu !
Di pettu à un esempiariu uriginale di i Raguali di a nazione corsa di u diociottèsimu, prisentatu da u più ghjòvanu elettu di l’Assemblea, Petr’Antò Tomasi, i dui presidenti è l’Esecutivu fecìanu ghjuramentu à u so pòpulu. A lea di a stòria cù a longa strada di a nostra lotta era fatta è, cù ella, s’aprìa un antra tappa pè u nostru pòpulu. Un annu dopu, si pò dì chì u guvernu naziunale chè v’avete messu in piazza hà tenutu i so ingaggiamenti.
Ramentu : Petr’Antò Tomasi : « Voi, Presidente di l’Esecutivu di Corsica, Presidente di l’Assemblea di Corsica, cunsiglieri di u Guvernu di Corsica, eletti da a vulintà di u Pòpulu Corsu, leghjittimamente maestru di se stessu, site chjamati, in stu ghjornu di u 17 di dicembre di u 2015 a purtà ghjuramentu nant’à a Ghjustificazione di a Revoluzione di Corsica, di difende sempri, è in ogni circustenza, l’interessi di u nostru Pòpulu. »
Inseme, i presidenti è i cunsiglieri esecutivi : « Facciu ghjuramentu di travaglià, in u quadru di e mò funzioni, cù u più grande rispettu di l’intaressu generale e a prò di u Pòpulu Corsu : Facciu ghjuramentu ! Facciu ghjuramentu di travaglià in u quadru di e mò funzioni, cù unestità, ghjustizia, prubità, equità è integrità : Facciu ghjuramentu ! Facciu ghjuramentu di travaglià in u quadru di e mò funzioni, cunsiderendu cù listessu rispettu u fattu maggiuritariu è u parè di a minurità, è essendu primurosu di è cunvinzioni diverse : Facciu ghjuramentu ! Facciu ghjuramentu di travaglià in u quadru di e mò funzioni, cù u pinseru cuntinuu di a trasparenza è u rispettu di i fundami demucràtichi è umanisti : Facciu ghjuramentu ! Facciu ghjuramentu di travaglià è d’impigna mi, in e mò funzioni, in u quadru universale di u dirittu di i pòpuli à ammaestrà à modu lìbaru u so destinu : Facciu ghjuramentu ! »
Pòpulu caru, ci ferma un annu per cuntinuà ssu travaglione.
Avemu u bisognu di voi, cari militenti di a càusa corsa, di u vostru sustegnu è di i vostri incuragimi. Sparghjìtevi nant’à i terreni di a lotta, femu nazione inseme. Aiutèmuci ! Bon’Natale è bone feste di Capu d’Annu à tutti !
Fabiana Giovannini.