Accapu di a redazione

Maffia

Arritti hà resu contu di a sessione di l’Assemblea di Corsica cunsacrata à u prublema di a maffia in Corsica u 18 di nuvembre scorsu. Circate à leghje i nostri artìculi sè vo ùn l’avete ancu fatta*. Ferma sempre assai da dì contr’à sti cumpurtamenti ch’imprigiunèghjanu a demucrazìa è affànnanu a nostra ecunumìa. Una publicazione nant’à u situ U Levante ci hà interessatu assai perch’è spieca, in u duminiu di u fundariu, quantu sse bande maffiose ponu arrichìscesi è cumu si puderìa luttà contru, solu appiechendu a legislazione attuale. U Levante principia ramentèndu i prupòsiti di Jacques Mariani ind’è Corse-Matin di dicembre 2021. Dice l’omu : « V’aghju da spiecà cumu si pàssanu e cose in Corsica. Sè dumane u mere ricusa à un prumutore u prugettu immubiliare ch’ellu vote custruisce nant’à un terrenu, noi, sè no cunniscimu u merre, anderemu à truvalu per cunvìncelu di lascià u prumutore custruisce nant’à ssu terrenu. Si passa bè è allora diventemu assuciati à u prugettu. Si passa male, è tandu, à a lìmita, pudemu discute di ciò chè no femu. Ci accunciemu cusì, hè nurmale è ùn hè micca racket. Si passa cusì in Corsica. Tuttu u mondu si cunnosce. Vò à truvà u merre di u mo paese, s’ellu ci hè un terrenu, mi lascierà custruisce »… « Nisun reazzione » si lamenta U Levante… L’associu di difesa di l’ambiente ci spieca quantu « l’esistenza di PLU è di carta cumunale cù numarose zone custruttìbule illegale ghjuvendu di pseudo argumenti à certi meri è à u Statu per dà autorisazione d’urbanìsimu, sò state è sò sempre una càusa impurtantìssima di a custruttibilità maiò ch’hà cunnisciutu è cunnosce sempre a Corsica ». A cunsequenza diretta hè ch’elli sòrgenu cumpurtamenti maffiosi allittati da l’arricchiscimenti tremendi ch’elli ponu fà.

Spieca torna l’associu cumu hè pussìbule. Vale à dì, i merri adòpranu documenti d’urbanìsimu. I servizii di u Statu (DDTM) è parechji urganìsimi, frà i quali a Cullettività di Corsica, danu u s’avisu, à favore o contru, secondu i documenti direttori aduprati cum’è e lege di l’ambiente ben intesa, ma dinù u Padduc. I prefetti dopu dèvenu cuntrullà a legalità di ssi documenti. « Troppu spessu u cuntrollu di legalità hà mancatu » dice U Levante. « Per un dettu i prefetti ùn anu micca deferatu malgratu l’avisu sfavurèvule di i so servizii ». Aghjusteremu noi, chì sè e cose si pàssanu bè nanzu, ùn ci hè mancu bisognu di purtà lagnanza di pettu à a ghjustizia. U merre hè tenutu di rispettà e lege. L’avisi dèvenu esse sodde di pettu à documenti d’urbanìsimu ch’ùn l’anu micca rispettate. Ma, per disgrazia, ugnunu, à ogni livellu, troppu spessu chjode l’ochji è lascia corre di pettu à documenti ch’ùn rispèttanu micca e lege… « Ùn si pò chè custatà a vuluntà evidente di certi merri è di u Statu d’ùn vulè appiecà u còdice di l’urbanìsimu » dice torna U Levante chì disciuleghja dinù nant’à a debbulezza di a Cullettività di Corsica. È cum’ellu ùn ci hè micca sanzione, a sucietà si stalla nant’à ssi disfunziunamenti. È quand’ella disfunziona a sucietà, hè fàciule di stallà cumpurtamenti maffiosi. Ogni tantu, ci sò lagnanze quantunque, ma u tempu di a ghjustizia hè troppu longu è e sanzioni ùn sò mancu appiecate ! U Levante face une poche di pruposte per sminuisce e pressioni, migliurà l’infurmazione, sanziunà, rinfurzà i mezi di a ghjustizia, appiecà sempliciamente a lege**. « A Corsica ùn sarà micca strutta da quelli chì fàcenu u male, ma da quelli chì fièghjanu è i làscianu fà » cunclude U Levante. O ghjente, lascieremu fà ? •

Fabiana Giovannini.

 

* Arritti n° 2771

** https://www.ulevante.fr