Face deci ghjorni avà chè tù sì addurmintatu à scumbatte contr’à a falcina, sta morte secca chì ti vole piglià. Teni forte o Yvan, falli vede quant’è tù sì forte. Fieghja i toi chì ti chjàmanu à svegliati, fieghja ste millaie di personi fallate in carrughju per tè, pè u to vultà, da chè tu rientri in casa toia, à u latu à i to figlioli, Ghjuvan’Battista è Ghjaseppu, à i toi affundati torna oghje ind’è a pena, e to capre à mezu à a to machja t’aspèttanu, volti à cundùcele torna pè i to chjassi. Fieghja sta ghjuventù chì ti rivendicheghja. Sò nati quand’è tù pigliavi a machja per fughje i caneghji, annanàvanu sempre quand’elli t’anu chjappu, ùn sanu nunda di e to suffrenze in priggiò, nunda di e to lèttere chì malgratu tutti i to guai, ci tramandàvanu a to fede è u to « murale d’acciaghju ». Ma sò quì à riceve e battarchjate, e palle di plàsticu cecche, insanguinati sott’à e bastunate d’un Statu infame, assuffuchendu di sse bruttaccie lacrimusgene. Ti rivendichèghjanu è si sèntenu figlioli di tè. Ùn a sanu cumu dìttila, ma u to lettu di suffrenza li hè insuppurtèvule è mùghjanu a so còllera è u so addisperu. Fieghja ci tutti o Yvan, facci segnu, dacci speranza, à pressu à un cinnulamentu d’ochju, un trignamentu di lapre, un soffiu più forte, un ditu chì si vole move… Ci vedi, ne sò cunvinta, ci senti, è vulerii ancu tù fatti sente. Apri l’ochji o Yvan, n’avemu u bisognu. A ti meriti. Bàstanu avà l’annate di patimentu è turmenti inghjusti. Hai vintu u drittu di ritruvà a to terra, di rivede u to celu è u to paese, di sente i prufummi chì t’anu tantu mancatu, di sente impaghjellà l’amichi paisani, di fatti arrustì un figatellu ind’è carminu, di munghje u to bestiame è sente mezu à i to mani i so pulpiti. Svègliati o Yvan, t’aspettemu è avemu torna bisognu di tè, di a to forza è di i sacrifizzi accunsentiti sin’à quì. Dicci ciò chì s’hè passatu, cunfondi da u to ritornu sti mullizzi ch’anu vulsutu fatti tace per sempre. Ti vulìanu tumbà, è sì ghjuntu una fiara, un sìmbulu di resistenza. Guarda sta ghjuventù persa è addisperata, chì ùn sà più cumu sputà u so sìntimu d’inghjustizia. Ella cerca à inventassi un antru avvene. Hà bisognu di e to parule per appaciassi è dassi di rimenu pè a custruzzione di i nostri lindumani, invece di pate torna dulori è sacrifizii. N’avemu abbastanza di sta stòria ricumenciata, ùn vulemu più martorii, ti vulemu à tè, à u to surisu, u to stintu corsu, è u t’amore di a to ghjente è di a Corsica. Ti prechemu. Svègliati. •