650 spurtivi ucràiniani sò morti durante a guerra contr’à i Rùssii. L’atletu ucràinianu à i Ghjochi Olìmpichi Vladyslav Heraskevych hà vulsutu rèndeli umagiu stampendu nant’à u so cascu di skelotonadore i visi d’una ventina di ssi spurtivi assassinati. « Certi èranu i m’amichi » hà spiecatu Vladyslav. Ma u cumitatu olìmpicu l’hà squalificatu listessu, per vìa di u regulamentu ch’interdisce a prupaganda per prutege u spìritu spurtivu. « Sta decisione mi sbremba u core » hà dettu Vladyslav, « aghju u sìntimu chì u CIO tradisce atleti ch’anu appartenutu à u muvimentu olìmpicu, ricusendu ch’elli sìanu onorati induv’elli ùn puderanu mai più prudùcesi ».
Si chjamàvanu Dmytro, Alina, Maksym, Yevhen, Andrii, Karyna, Mykyta, Kateryina, Viktoriia, Alexei, Daria… èranu, patinatore, alterofile, cazzuttadore, biatletu, ciclistu, kick cazzuttadore, ciuttadore, ginnastu, judoka, tiradore, ballarina… avìanu 25, 14, 22, 19, 35, 31, 17, 11, 9 o 20 anni… in gràzia à Vladyslav i so visi è a so stòria sò ormai cunnisciuti.
8.000 dumande d’alloghju suciale in Corsica in 2024, è solu 893 attribuzioni… hè u schiffru tremendu palisatu da u Vescu di Corsica ssu 14 di ferraghju per lampà una chjama à dà qualchi soldu per un operata à u prufittu di sta ghjenta ch’aspetta un alloghju.
• Leghje dinù : Campagne d’appel aux dons de l’Église de Corse – Donner un toit, restaurer la dignité
6.000 munizioni, sfarenti ogetti per mascarassi, uni pochi di talkies walkies, più di 18 chilò di splusivi, 67 detonatori, una quarantina di granate, millaie di metri di mesce, 20 arme à focu, 11 arme à spalla, 2 fucili di guerra, 4 arme di pugnu, un pistulettu mitraglia è 2 fucili à pompa… sò l’arme truvate piatte in un alloghju in Prupià…. Piombu !
8 mutori di 350 tunnelate sò ghjunti à u Ricantu in Aiacciu pè a nova centrale d’elettricità chì deve esse in serviziu in 2028. Hè principiatu u cantieru di ssa centrala d’una putenza di 130 megawatts per un bugettu di 800 millioni d’àuri. A centrala hà da funziunà à a biomassa, vale à dì hà da ridduce di 95% e particule fine, ùn sputerà più nisun emissione di solfanu è averà 75% di CO2 in menu per raportu à u funziunamentu attuale di u Vaziu…
18 chilò di cocaina sò stati chjappati in Cismonte in 2025, contr’à solu un chilò in 2024. Listessa crèscita pè u cannabis : 100 chilò chjappati in 2025 contr’à 93 in 2024. È s’aghjusta una nuvità quist’annu : un chilò d’ecstazy chjappati… E guardie custoghje anu duppiatu, è l’incarcerazioni sò state multiplicate per trè, face sapè u prefettu di u Cismonte, Michel Prosic. « Tuttu si passa nant’à i retali suciali è quelli ch’arrècanu » spieca Anne Valla, a diretrice di a pulizza naziunale in Bastia chì palesa a crèscita di e donne in ssu tràfficu. Una donna incinta hè stata arrestata in traccia di purtà a droga. A droga, una calamità in Corsica. •
• Leghje dinù
