L’Assemblea di Corsica hà adupratu una muzione à l’unanimità per dumandà à u ministru di l’Educazione naziunale è à i prefetti in Corsica d’accunsentisce a cuntrattualizazione di l’insignanti di Scola Corsa. Vale à dì a presa in càrica da u Statu di a paga di l’insignanti. Ùn hè un privilegiu ma un drittu ch’ellu ci permette u statutu di a Corsica. In Francia, l’insignamentu hè un duvere à rende à ogni zitelli secondu à a Custituzione. Per vìa di ssu principe l’insignamentu privatu o assuciativu pò cuntrattualizà cù u Statu a pussibilità di a presa in càrica di i so insignanti. È si face per un dettu dapoi decine d’annate per l’insignamentu cunfessiunale.
L’associu Scola Corsa, chì empie tutte e cundizioni d’un insignamentu di qualità è chì risponde à una dumanda forte di parenti d’elevi per benefizià d’un insignamentu immersivu assuciativu, hè dunque leghjìttimatu per dumandà sta cuntrattualizazione cù u ministeru di l’Educazione naziunale, cum’elli a fàcenu digià tutti i retali assuciativu in Francia per l’insignamentu di u Brittonu, u Bascu, u Catalanu, l’Occitanu o l’Alsazianu. D’altronde, e cumpetenze pròpie di a Cullettività di Corsica in ciò chì cuncerna a pianificazione di a so pulìtica linguìstica l’autorizeghja à dumandà, è à ottene, direttamente à u più in furia, da u prefettu in Corsica, ssa cuntrattualisazione cù u Statu.
Disgraziosamente, per avà, u prefettu cismuntincu hà ricusatu sta dumanda…
U sustegnu di l’Assemblea di Corsica, in tutte e so cumpunente, hè dunque impurtantìssimu per rilancià a dumanda. Da nutà chì, posta inizialmente da Nadina Nivaggioni, sta muzione hè stata prisentata da tutti i gruppi di l’Assemblea, ben intesa cù u sustegnu appughjatu di u Cunsigliu Esecutivu.
E paghe di l’insignanti sò ben intesa a spesa a più maiò di l’associu è sò un tràmpalu per u so sviluppu malgratu e numarose dumande di cumune, in Cismonte cum’è in Pumonte, per apre una scola.
Si spera dunque chì ssa chjama di l’eletti corsi sarà intesa. È in furia ! Arritti ne rivenerà à parlà da quì à pocu. •