Tamanta pena pugnalata in core ! L’amicu caru, u patriottu di e prim’ore di l’ARC, u fratellone ch’hà sappiutu frà altri accumpagnà i mo primi passi incerti di ghjòvana militente, cù a so sperienza, a s’ascolta paterna, u so sguardu generosu, u corsu ind’è l’ànima, u spìritu accanitu è lìberu, l’omu ghjustu pè i soi è per l’altri, l’elettu cumpetente è instanchèvule, innamuratu di a so missione quant’è di a so cara cumuna di Lumiu, Ghjuvanni Paolini vene di lasciàci dopu à una lotta tremenda contr’à ssa malatitaccia di u Covid. Face parte di ssi militenti spùtichi ch’anu francatu mondu situazioni pèssime induv’ellu ci vulìa à sapè stà fermu è calmu, avè u rinculu necessariu, truvà e parulle di savviezze, senza puru mai cuncede l’essenziale. Di ssi militenti impregnati da i fundamenti, a terra, a lingua, u pòpulu, puru essendu sempre ingordu à scrìveli ind’è l’avvene. O Ghjuvà quantu ci hai da mancà ind’è ssu mondu d’inghjustizie è di viulenze, ind’è ssa Corsica persa, troppu suvente pront’à vende à straccia mercatu e so terre, a so lingua, a so ghjente… Ti stumacavi di l’in- ghjulie è e barbuzerìe di u Statu o di u clan, cum’è t’inzergavi dinù di e bisbìglie trà naziunalisti, di e derive, l’orgogliu, e ghjelusìe chì ti stumaccàvanu. Senza fiara cum’è tè, cum’ellu hà da esse diffìciule di custruisce ssu paese sunniatu inseme ! Hai fattu cum’è noi tutti, ti sì inzerchitu contr’à ssu coronaviru chì s’hè impostu in pochi mesi per spàrghjesi in u mondu sanu è impuzzichisce u nostru cutidianu. In pochi ghjorni ti sì intesu faticatu pò uspitalizatu, è in furia affucatu, hai scumbattutu simane sane per vince ssa malamorte. Ùn ci sì ghjuntu. S’hè manghjatu pocu à pocu i to pulmoni cacciènduti a forza di u rispiru. Ma u to soffiu ferma eternu cum’è quelli fratelli chì ci anu lasciatu nanzu à tè. Culandi, ritrovi a to fiara, Edimondu, è uni pochi d’altri amichi è fratelli. È forse inseme, ci aiuterete à tene sempre arritta è fiera a nostra bandera. Pensemu à i toi, adduluriti d’una pena infinita. Li mandemu basgi affettuosi è fraterni. Pensemu à a Corsica chì perde un veru militente. È pensemu à u mondu induve decine di millioni di malati scumbàttenu sempre contr’à ssu flagellu. Sò 40.425.663 casi di Covid dichjarati à st’ora dapoi u principiu di l’epidemìa. 1.118.635 ne sò morti. È tù. Riposi in pace o Ghjuvà. •
Fabiana Giovannini.
Lire aussi Hè mortu Jean Paolini
