« Serà cuncretizatu di settembre 2021, à l’occasione di a rientrata sculare, u prugettu di creà scole immersive in lingua corsa, capitanatu da l’associu Scola Corsa chì metterà in anda è in sesta l’inseme di u so retale è chì annunzia, oghje, in un primu tempu, l’apertura di dui siti purtati l’unu è l’altru da associ lucali, induv’elli s’impègnanu i parenti d’elevi.
Hè chjamatu à cresce è spàrghjesi stu retale, da ch’ellu custituissi pianamente è bè una vera filiera d’insignamentu immersivu, da a materna à u bascigliè.
Per avà, parechji zitelli sò digià scritti in e duie prime scole :
– In Biguglia, in i lucali messi à dispusizione da a cumuna in senu à a scola Simone Peretti. Una scola materna di primu è segondu livellu (cinini di 3 è 4 anni). Stu prugettu hè purtatu da l’associu Scola Corsa di Biguglia, presidatu da Alanu Gherardi.
– In Bastia un altru situ si struttureghja dinù pè a rientrata di settembre 2021 chì u locu precisu serà annunziatu sti pochi ghjorni à vene. Stu prugettu hè purtatu da l’associu Scola Corsa di Bastia, presidatu da Pasquale Castellani.
Scola Corsa fonda u so prugettu in u listessu solcu chè e sperienze cusì pusitive custatate in Paese Bascu (Seaska) è in Brittagna (Diwan) induve chì a filiera assuciativa conta in e so scole più di 8000 sculari (e duie regione cumprese) da a materna à u bascigliè. In Occitania, u retale Calandreta si hè sviluppatu nant’à u territoriu sanu. In Catalogna, a Bressola hà creatu u so cullegiu dopu strutturatusi manu manu tuttu u ciculu primariu, un annu dopu à l’altru, fin’à u CM2. In Alsazia, ABCM prupone un’offerta cumpiita in u primariu, da a materna à u CM2.
A pedagugia di ste scole hè quella di l’immersione schjetta, in materna è in CP. S’intruduce dopu, à partesi da u CE1, modi d’amparera in francese. Stu metudu arreca risultati tremendi à tanti livelli : i sculari acquìstanu a lingua di modu attivu è ne divèntanu locutori naturali ; ammaèstranu dinù u francese (à l’occasione di e prove di l’Educazione Naziunale, i sculari di e scole immersive sò stati valutati cum’è più capaci chè quelli di e filiere monolingue) ; sò capacissimi infine è più cumpetenti in ciò chì tocca à sapè leghje è cuntà.
L’eccellenza di a filiera hè accertata dinù in cullegiu è in liceu, frà altru da i risultati ottenuti à u bascigliè. U liceu Diwan di Carhaix, in Brittagna, hè statu classificatu numaru 1 in Francia parechje volte. Listessu per u liceu di u retale Sesaka, Bernat Etxepare, in Baionna (Paese Bascu).
E principale differenze cù e filiere di l’Educazione Naziunale sò queste quì :
– In e scole immersive di l’insignamentu pùbblicu, l’immersione vale per 80 % di u tempu insignatu è solu per u cìculu di scola materna. Esiste qualchì situ, à tìtulu di a sperimentazione (6 siti per circa 200 sculari). Ci hè chì, da assigurà una vera cumpetenza in lingua corsa, ci vole chì i sculari pòssanu benefizià di a pràtica immersiva longu a scularità.
– In ste scole, l’immersione ùn hè aduprata chè durante u tempu sculare, vene à dì quellu passatu cù l’insignante.
U mètudu praticatu da Scola Corsa stende l’immersione à l’aiuta materna è à u tempu perisculare, recreaziò, cantina, guardieria, animazione, attività ludiche… Si face chì i prugressi è l’acquisti fatti da i sculari vènenu più in furia puru chì u so mezu famigliale sia francòfunu.
L’insignamentu immersivu praticatu da u retale d’associ Eskolim hè un insignamentu assuciativu, làicu è gràtisi. Scola Corsa si scrive pròpiu in sta dimarchja quì.
Hà adderitu Scola Corsa à u retale Eskolim è n’hè oramai u sestu membru ; stu retale hà custruitu u so sviluppu nant’à a basa di a cuntrattualizazione cù u Statu, tale chè prevista da i testi legali. In stu quatru custì, l’insignanti dipèndenu di l’Educazione Naziunale à l’istante chì a filiera Scola Corsa averà pussutu cuntrattualizà cù u Statu (cum’elle l’anu fatta e filiere basche, brittone, catalane, occitane è alsaziane nanzu à ella) è ricevutu u so aggradimentu.
Sta cuntrattualizazione pò accade passatu un periudu prubatoriu (3 anni di règula) chì tuccarà à Scola Corsa à arricà a prova di a so capacità à assume l’oblighi regulamentarii è prugrammatichi richiesti da l’Educazione Naziunale. Sta capacità sarà valutata da ispezzione diverse, à l’iniziativa di u Retturatu. Avemu l’ambizione di ripruduce, in Corsica, u listessu prucessu chè quellu seguitatu da i nostri partenarii è cumpagni d’Eskolim.
Durante stu periudu prubatoriu, a càrica bugettaria vene pisiva è ci vultemu versu i nostri sustegni da ch’elli ci permèttanu di francà u passu :
– Da quì à pocu, u gran pùbblicu puderà participà à una dimarchja di crownfunding.
E persone chì vuleranu purtacci un sustegnu più perenne chì permetterà di fà più siguru l’avvene di a filiera puderanu mandacci un sceccu o stabbilisce versamenti bancarii, puntuali o permanenti.
– L’intraprese vènenu sullicitate à u tìtulu di u mecenatu.
– E cumune sò sullicitate da purtà u so sustegnu, puru ch’ellu fussi mudestu.
– A Cullettività di Corsica accumpagnarà l’associu Scola Corsa, à u livellu ghjurìdicu è finanziariu, da ch’ellu mettissi in òpera stu prugettu d’apertura di filiere immersive, in cuerenza cù a pulìtica educativa glubale, à favore di l’insignamentu di a lingua corsa in l’Accademia.
Eskolim hà u so pròpiu centru di furmazione : l’« Institut Supérieur des langues de la République française » (ISLRF) chì piglia in càrica a furmazione di l’insignanti è li permette d’acquistà e cumpetenze chì li ci vole per stu modu d’insignamentu. Scola Corsa benefiziarà di l’aiutu è u sustegnu di sta struttura ricunnisciuta da u Ministeru di l’Educazione Naziunale.
U successu di ste prime aperture di scole in Corsica, cumpresu in cosa riguarda u sustegnu pupulare, hè fundamentale per dacci e più sigure guaranzie di strutturà a filiera da cima à fondu.
Per quessa chì oghje, lancemu una chjama da chì ognunu, citatini, militanti, intraprese è stituzione, diventessi membru fundatore di l’associu Scola Corsa.
Inseme, spannemu a lingua nustrale. » •