Anghjula Maria Santucci hè maestra di scola dapoi 15 anni. Hà avutu u so cuncorsu bislinguu in u 2006. Hà travagliatu in tutti i livelli di u primariu è hà una sperienza di a scola materna di 10 anni, quasi sempre in doppii livelli. Hà dinù una bella sperienza di l’immersione ch’ella hà appiecatu à a scola materna di a Ghisunaccia, induv’ella hà « pussutu vede tantu i prò cumu e limite di l’insignamentu immersivu prupostu oghje da a Scola Publica. »
« Dipoi sempre, a creazione di documenti è d’arnesi ghjè una parte impurtante di u mo travagliu di maestra : adattazione, traduzione, ch’ella sia à di per mè o in un travagliu di squadra, puru s’o pensu esse abbastanza avvezza à e specificità di a scola, mi piace à scopre è sperimentà nove manere d’amparà » spieca Anghjula Maria chì parla cù a so surella Anna Catalina un corsu schietu : « u Corsu hè a mo lingua materna. Ùn aghju amparatu u francese chè à 5 anni, una volta ghjunta in scola, chì tandu l’insegnamentu bislingu ùn esistia ancu. In accordu cù u mo percorsu persunale è professiunale, mi pare naturale d’aspirà à un insegnamentu in immersione cumpletta, moltu più in u quatru di u retale Eskolim. » Anghjula Maria serà affettata à a Scola Corsa di Biguglia. Focu à a ceppa !
Anna Catalina Santucci hè insignante bislinguu dapoi 15 anni anch’ella è ci dice « da chjuca aghju sempre parlatu corsu, hè a mo lingua materna. M’hè tandu venutu naturale di scrivemi à e prove bislingue di u cuncorsu di prufessore di e scole ch’aghju riesciute in u 2006. In u 2008 mi sò scritta in Master Lingua è Cultura Corsa, l’aghju chjappu in 2010 (Master 2). Aghju principiatu un travagliu di dutturatu trattendu di u chjam’è rispondi. U prisenteraghju quist’annu. » A funzione di direttrice di scola li hà permessu di sviluppà altre cumpetenze cume a cummunicazione o l’infurmatica, necessarie à a cuurdinazione è a gestione ammministrativa d’una squadra. Per via ch’ella hà duie criature à occupassi, serà a maestra rimpiazzente pè e duie scole è dunque a cuurdinatrice trà i bisogni di l’una è di l’altra. Dice Anna Catalì : « Sò cunvinta chì a tramandera di u corsu in una scola immersiva sana sana hè una via da vistigà. Mi piaceria ancu à scriveci i mo figlioli quand’elli averanu l’età sculare, u corsu essendu a lingua di casa. Stu prugettu cù a pussibilità di travaglià à fiancu à a squadra dinamica d’Eskolim mi pare interessante assai. » Forza !
Serena Guaitella hè di prima trinca anch’ella. Hà u so Master 2 d’insignamentu bislinguu dapoi u 2012. « L’insignamentu hè sempre statu per mè un ogettivu prufessiunale. Ma più a mo carriera si sbucina, è più a trasmissione di a lingua corsa diventa un scopu persunale. Allora per participà è cuntribuì à u mo picculu livellu à a salvezza di sta lingua chì mi tene tantu, aghju decisu d’addunì a mo brama di trasmissione di u corsu è u mo mistieru di maestra. Sapemu tutti oghje chì u bislinguisimu hè una ricchezza maiò per i nostri zitelli, ch’ella sia per l’amparera d’altre lingue ma ancu per u sviluppu cugnitivu in generale. » Ghjè cusì chì pè a rientrata di u 2018, Serena hà fattu parte di e trè prime scole di Corsica à entre ind’a sperimentazione di scole materne immersive in Ponte Novu. Ma u dispusitivu tale è quale hè custruitu da l’Educazione Naziunale l’hà delusa chì a piazza di u corsu ùn hè abbastanza impostu. Per quessa dice avè amparatu « incù una grande speranza » a nascita di e prime scole immersive assuciative. « Vogliu impegnami ind’è sta scumessa tremenda per l’avvene » dice Serena, « quella di a salvezza di a nostra lingua chì mi tene à core. » Serà a maestra di a Scola Corsa di Bastia. Ventu in puppa ! •
Fate in furia !
Pour inscrire votre enfant cette année…Il reste quelques places pour inscrire votre enfant en moyenne section (enfants nés en 2017). Adressez sans plus tarder votre demande à :
Pour Scola Corsa di Bastia : [email protected]
Pour Scola Corsa di Biguglia : [email protected]
Acceptation y compris d’enfants de communes voisines (Furiani, Lucciana, Borgu, nord Bastia).
