Michè Dominici hè cresciutu in u scagnu d’Arritti. Cù a so mamma, a nostra cara Teresuccia, smarita 9 anni fà, avìamu appruntatu una cameruccia ind’una sala di u scagnu, cù u so viculellu è tuttu ciò chì ci vole per occupassi d’un ciucciettu à pena natu ! Ci hà puntatu quì frà i so primi mughji. Più tardi, ùn sapia ancu marchjà ch’ellu mettìa già a so manuccia à l’arechja, mughjendu « Haaaaa » cum’è s’ellu vulìa cantà una paghjella ! Carinu ! Chjucu chjucu pichjava digià cù tuttu u so core nant’à i so tamburinucci di zitellu. È ùn era ancu tutt’à fattu giovanottu ch’ellu hà avutu di rigallu a so prima vera batterìa ! O quant’ellu era cuntentu ! O quant’ella era fiera a so mammuccia cara ! Oghje nè hà ùn sò quantu cascie è cascittoni ! Michè ghjoca magnificamente di a batterìa, accumpagna gruppi è cantadori. È gira per ste Francie cù i s’amichi di Four Kicks, un gruppu di mùsica pop. Ghjoca di ghitara dinù, è canta. Canta Michè tuttu ciò ch’ellu hà in core ! Canta a so passione, a Corsica, l’amore, e so figliole, tesore di a so vita, a so sposa, i soi. Canta u so paese di A Parata, I soi, parenti è paesani. Canta e so brame, e so nustalgìe. Hè un artistu chì s’hè fattu à l’àmbitu di e serate di u so zìu, Felì, è di i so parenti, babbu è mamma chì cantàvanu anch’elli, addurmintèndusi in a so (poussette) à e serate senza fina di pulifunìe. Hè cresciutu in mùsica. Pò, à u rìtimu di l’amichi è di l’incontri, hà imparatu. S’hè impregnatu di mùsiche è di culture, à l’azardu di giri è giranduloni di i Four Kicks. S’hè custruitu u so stintu. Canta inglese, francese, corsu. Michè hè un artistu chì prova sempre à inventassi, campendu di e so influenze, è di ciò chì li piace. È cum’è tutti l’artisti, u so sognu hè di truvà u pùblicu, di purtalu in u so mondu, di tuccà u soc ore.
Puru ùn hè sèmplice per un artistu di ghjunghje à spàrghjesi. È i ghjorni d’oghje, per l’artisti, sò cumplicati per ssi tempi di crisa. Ci vole à piglià rìsichi finanziarii. Hè ciò ch’ellu face Michè Dominici.
Hà sceltu di prudùcesi solu, in Biguglia, l’11 d’aprile pròssimu, à u Spaziu culturale Carlu Rocchi.
È sapete chì l’artisti sò perfezziunisti quand’ellu s’agisce di scuntrà u so pùblicu. Michè ci hà appruntatu una seratona in Biguglia. Parechji saranu torna l’amichi à accumpagnalu.
È e surprese ùn mancheranu.
Spicciàtevi à riservà e vostre piazze ! •
Piazze dispunibule ind’è Spartimusica è nant’à Corsicafestivals.com