U 19 di marzu scorsu in Casal di Principe, cità di 20.000 abitanti accantu à Nàpuli, è capilocu di i Casalesi, sustegni finanziarii di a Camorra, a màffia napulitana, si sò aduniti uni pochi di personi per cummemurà a morte di Giuseppe Don Peppe Diana.
Ssu prete curagiosu hè statu assassinatu da a Camorra, u 19 di marzu 1994. Nativu di Casal di Principe, Don Peppe Diana avìa chjamatu i cristiani à luttà contr’à a criminalità urganizata, dinunziendu tutte e cumplicità, sin’à u senu di i carabinieri ! Ricusava di tàcesi « per amore di u so pòpulu ». Cusì dicìa u sgiò curà. Avìa sparsu un manifestu induv’ellu prupunìa pè u più à i giòvani, a messa in ballu di piani pasturali « curagiosi ». A so ghjesgia era carca à trunchera tutte e dumènica. Dicìa : « Dìu ci chjama à esse prufeti. U prufeta hè sintinella. Vede l’inghjustizia, a dinunzia, è ammenta u scopu uriginariu di Dìu (Ezechiele 3, 16-18) ; u prufeta ammenta u passatu o si ne ghjove per tracerne a nuvità di u presente (Isaïe 43) ; u prufeta invita à campà ed ellu stessu campa a sulidarità in a suffrenza (Genesa 8, 18-23) ; u prufeta indita cum’è priurità a vìa di a ghjustizia (Jérémie 22, 3 – Isaïe 5). Cuscenti chì u nostru succorsu hè ind’u nome di u Signore ». Don Peppe Diana chjamava i preti à esse curagiosi anch’elli per uppònesi à a màffia. Avìa 36 anni quand’ellu hè statu tombu da cinque palle in corpu à u principiu di a messa…
Un associu porta u so nome, creatu dopu à l’assassìniu. Crim’Halt cunduce azzioni da ch’omu ùn si scordi di u sacrifiziu di Giuseppe Peppe Diana. Appughjèndusi nant’à u prugramma eurupeu Erasmus, adunisce ghjente, frà i quali vìttime di u tràfficu di a droga, ghjurnalisti, membri d’associ di lotta contr’à a màffia, cum’in Corsica, u cullettivu A Màffià Nò, A Vita Iè è u cullettivu Massimu Susini. U 19 di marzu, sò stati invitati à sparte e sperienze di Crim’Halt, partecipendu à una settimana di studii in Casal di Principe induve i Casalesi sò stati addebbuliti in gràzia à l’azzione di citatini curagiosi. U tema di sta settimana di travagliu era a ristituzione di l’avere di i maffiosi per sustene scopi suciali.
A Casa Don Peppe Diana hè cusì un casale impunente ch’appartenìa à un capizzone casalese. Hè diventatu un locu di memoria in l’onore di vìttime di i Casalesi, cù fottò di a ghjente assassinata, attelli educativi pè i giòvani, locu di riunione di e famiglie di sse vìttime… Ci hè dinù un risturante tenutu da ghjente autista, o torna una cuuperativa di mozzarella tenuta da anziani prigiuneri stroppii, ecc. Una cinquantina di prupietà casalese sò state cusì cunfiscate à a màffia per ghjove di prugetti suciali.
100.000 personi anu manifestatu in Roma quist’annu in cummemurazione à l’azzione di Don Peppe Davia. A cuurdinazione è a sulidarità di tutti i cullettivi contr’à a màffia hè indispensèvule, cum’ella hè impurtante sta misura di cunfiscazione di l’avere di i maffiosi, da fà avanzà a lotta contr’à ssu fragellu. In Corsica dinù ci volerà à prende ste misure.
Don Franco Picone, u prete ch’hà rimpiazzatu Don Peppe Diana in Casal di Principe avìa dettu annu : « assai cose anu scambiatu in u spìritu di a ghjente, un veranu hè in traccia di nasce ». Fùssila puru. •