Eccu una puesìa di l’amicu pueta smaritu, Petru Vachet Natali. Hè stata messa in cantu da Antone Ciosi di maghju 1988 in i so spetàculi « I canti di a libertà ». Conta una Castagniccia – è cun ella, una Corsica – bramosa di libertà è d’avvene.
Da lu biancu luminellu
Sìmbulu di luce chjara
À l’incendiu natu in celu
Quandu s’accende la fiara
Castagniccia sì ribella.
Da li primi fochi accesi
In cima di le culline
Da spiccà li corni appesi
Quandu svolta le marine
Castagniccia sì ribella.
Da le stàntare di Boziu
Guerrieri di tempi andati
Mai n’ùn sò stati à l’oziu
Quandu funu casticati,
Castagniccia sì ribella.
Da quandu sbocca lu Turcu
Cullendu da fiuminale
È ch’ellu si vede un lurcu
Mez’à quellu tempurale,
Castagniccia sì ribella.
Da la chjama chì ribomba
Da li poghji à li pughjali
Per l’eroi senza tomba
Tazzati da li pugnali,
Castagniccia sì ribella.
Da lu vechju San Petrone
Chì veghja sopr’à l’arestu,
Sunnendu lu ratachjone
Cum’è quand’ellu hè furestu,
Castagniccia sì ribella.
Da le teppe à li pentoni,
Da la terra à lu matticciu,
Da le fronde à li gamboni
À lu fruttu prumaticciu,
Castagniccia sì ribella.
Feremu la nostra stòria
Senza mai più catene,
Cantà vogliu la to gloria
Pè u sempre, per l’avvene
O ribella Castagniccia. •