Julie averìa avutu 38 anni quist’annu. Averìa accumpagnatu i so dui maschji ind’è a vita. Averìa godu di u paese ch’ella avìa adupratu, Lìsula Rossa, pruvendu à custruìscesi un indipendenza cù u talente artìsticu ch’ella avìa, fabrichendu ghjuvelli ch’ella vendìa à u mercatu. Ma a so vita li hè stata arrubata, di manera bestiale da u babbu di i so figlioli chì l’hà assassinata, dopu à parechje viulenze è minaccie da e quale pruvava à sbarrazzassi a corcia donna. Julie hè morta perchè era una donna. È chì per cert’omi, esse donna, ghjè esse un ogettu, una schiava, un strumentu chì l’appartene. Julie avìa postu lagnanze parechje volte à a gendarmerìa, ma perch’ella era donna, ùn hè stata pigliata à u sèriu. In 2019, hè stata a trentèsima vìttima di ciò chì a sucietà chjama un feminicìdiu. 146 donne sò morte cù Julie Douib in 2019. Staccata da u so cumpagnu dapoi parechji mesi, quellu ùn a suppurtava. L’espiava, a talluzzava, a minacciava… Ella, curagiosa, andava à lagnassi à i gendarmi. Ancu u babbu, minacciatu, hà postu lagnanza. In vanu.
U 3 di marzu 2019, Bruno Garcia-Cruciani hè ghjuntu à u s’appartamentu cù un arma di calibru 9 millìmetri è cù un silenziosu, è li hà tiratu à dossu trè volta. A manca a prima volta, a corcia Julie prova à scappà sin’à a càmera di i figlioli ch’ùn ci èranu ancu assai. Julie hè tocca à u bracciu, corre sin’à a terrazza supplichèndulu, casca in terra, li vene ellu à dossu torna è li tira una palla à u torace… Pò si ne và. Julie assuffoca, si viota di u so sangue. Una vicina hà vistu u drama da u so balcone. Un antra ch’hà intesu e pistulettate accorre è sente è so ùltime parulle : « m’hà tombu »… Pocu tempu nanzu, avìa dettu à i gendarmi, « ci vulerà ch’ellu mi tombi per chè vo mi pìgliite à u seriu ? » Eccu. L’emuzione hè stata tamanta in Corsica, ma dinù in Francia, è u guvernu avìa urganizatu u Grenelle di e viulenze contr’à e donne à a sèguita di stu crìmine. Parechje misure sò state prese, ma dapoi u martoriu di Julie sò morte torna 450 donne assassinate da u so cumpagnu o u so anzianu cumpagnu…
U 16 di ghjugnu di u 2021, Bruno Garcia-Cruciani hè cundannatu à a perpetuità cù una pena di sicurezza di 22 anni è a suppressione di a so autorità parentale. U Tribunale hà dettu tene contu d’un rìsicu di ricumencià, d’un spìritu vendicativu, di l’assenza di rigrettu è d’una rivendicazione di u so gestu in prigiò… Puru dice l’omu ch’ùn avìa micca l’intenzione di tumbala è dumanda omancu di pudè cunservà a so autorità parentale… I maschji di 12 è 14 anni oghje (8 è 10 à u mumentu di u drama) ùn ne vòlenu sente parlà. « Vanu megliu ma sò strutti. Chì l’assassìniu di a so mamma possi cunservà ssu drittu di riguardu nant’à a so vita, ancu di manera simbòlica, li hè assai diffìciule » hà palisatu u babbu di Julie. Postu ch’ellu hà fattu appellu, a cundanna di a pèrdita di u so drittu parentale hè suspesa. Ssi corci zitelli anu vistu soffre a so mamma senza pudè fà nunda. U prucessu in appellu s’hè apertu ssu 20 di ghjennaghju 2023. È ssu mese di ghjennaghju conta già dui altri feminicidii in Francia. •