Accapu di a reddazzione

#Aviu

Èranu parechje centinaie à sfilà nant’à u Corsu Paoli sàbatu scorsu in Bastia per dinunzià l’abusi  è e viulenze sessuali. Parechje decine sò digià  troppu. Pensendu à tutte ste ghjuvanotte o ghjuvanotti  feriti in core, in i so corpi è ind’è l’ànima, hè una  piaga à u nostru esse cullettivu. Si sfòndanu i valori, l’onore, e richezze di e virtù famigliale. Cum’hè pussìbule ? Avìanu 6, 10, 15, 20 anni o un pocu di più.

S’hè sprufundata a so nucenza, a so fede è a so cunfidenza in l’altru, è ci hè vulsutu à ch’elli si custruìscenu  quantunque, cù ssa guerfa è ssu malèssere.

«Aghju pientu à longu à a manifestazione, ma mi  sentu più forte oghje » dice una zitella. Cù u muvimentu  #Iwas s’hè liberata a parolla per parechje vìttime  ch’anu francatu a so paura, u so malasgiu, a so  vergogna. Anu trovu a forza è u curagiu ch’elli ùn  avìanu sin’à quì ind’è a forza è u curagiu di l’altre  vìttime. Sapendu d’altre suffrenze, anu pussutu  supranà a soia, a suffrenza, per scumbatte a minaccia,  a sottumissione, u terrore ch’elli anu cuntinuatu à  pate. « Viulenze avà basta », « pigliate e nostre  lagnanze », « innò ghjè nò », « ùn sì micca sola », « ùn  stemu più zitte », « a vergogna cambia di campu »,  « vi credimu »… tutti sti motti scritti in i pannelli di a  manifestazione còntanu u so dulore è a so collera,  à tempu à e nostre vergogne. Quantu suffrenze per quantu ochji chjosi di i parenti è l’amichi ch’ùn anu  sapiutu vede ssa prufonda squarciata ? Ma cosa hè  chì s’hè buzaratu ind’è a nostra sucetà per ghjùnghjenne  à tamantu sfracellu ? Cum’hè ch’elle sò cusì  numarose sse vìttime ? Cum’hè tuttu stu silenziu ?

Cum’hè ch’ellu ùn ci hè statu soprasaltu di a sucetà corsa ? Cum’hè ch’ellu ùn ci n’hè veradimente ancu  oghje ? «Qualchi omi pulìtichi èranu presente, per  vìa di l’elezzione » hà cummentatu un ghjurnalista…

Ssu discorsu hè tremendu. Interpretà ssa presenza  pulìtica cum’un bisognu di mustrassi hè un fiascu  spaventosu pè a Corsica è a so capacità à dà di  pettu à ss’impiastru umanu. Cumu fà per scumbatte  sse derive ? Cumu cambià sse mentalità mulizzose ?

Piglià cuscenza ch’ellu ùn hè micca un traversu geneticu, ma chì forse ci hè dinù qualcosa ch’ùn và micca  ind’è l’educazione di i maschji. U rispettu di a donna, di u so corpu, di a so libertà, hè un puntellu di demucrazìa è d’umanità. Ùn fà casu à ssu rispettu hè rìsicu di derive pè a sucetà. È u rispettu, s’impara cù l’educazione è l’esempiu ch’omu dà à i so figlioli, maschji  è fèmine.

« Prutege e nostre figliole, educà i nostri maschji » dicìa a banderole in cima à a manifestazione. « Sò fiera di noi d’avè riesciutu à adunisce cusì tantu  mondu, sò fiera di voi tutti chì site venuti à sustèneci.

Di voi altri chì site ghjunti à mughjà è chjamà ghjustizia  cù noi. Inseme avemu da fà move e cose » hà  dettu una zitella. Bramèmula.

 Fabiana Giovannini.