Bon’annata !

Utìtulu di u cutidianu ssu 29 di dicembre  pruclamava : «Cumu a Corsica hè diventata  naziunalista in trè elezzioni »… Iè, venimu da  luntanu. Ci vole à arricurdassi induve no èramu  in 2010… u naziunalìsimu pruvava à rilevassi da  l’èpica à più fosca di a so stòria cuntempurànea…  a guerra fratricidia in a clandestinità avia fattu  decine di morti, strutta era a cunfidenza, affucate  e brame d’avvene. Uni pochi annigati ind’è  ssa desillusione s’èranu messi à capu di scuzzulà  tuttu què, marcà e cuscenze, sperendu pudè  ritruvà fiatu : l’assassiniu di u prefettu di Corsica  hè statu un terramotu, ma micca in u sensu bramatu.

20 anni dopu, ùn ne simu ancu rimessi ! Trà  incumpreensione è stumacheghju, u pòpulu ùn hà  micca accettatu tamanta inghjustizia. 40.000 personi  sò fallati in carrughju à dì innò à a viulenza.

U Statu ellu ci hà mandatu « l’omu ch’ellu ci vole  induv’ellu ci vole »… à ghjucà cù u focu ! À tempu  cù a ripressione ceca, decine di Corsi sò stati  arrestati, maltrattati, impriggiunati. Vite è famiglie  strutte è marturiate. U pòpulu hè statu dettu  «prefeticidiu », inditatu è ghjastimatu. U clan s’hè  rinfurzatu cù u riferendum di u 2003, è cù ellu a  so pulitichella. Colmu d’impunità, n’hà fattu quant’è  sette, cumbrìcule è scruccunerìe… À tempu à a  clandestinità perdurendu in e so tràppule, u naziunalìsimu  spezzatu ùn ghjunghjìa à truvà l’usciu…

Eppò, pocu à pocu, un discorsu s’hè impostu.

Demucrazia, trasparenza, difesa di a terra, salvezza  di a lingua. Avvene. Unione di u pòpulu.  E municipale di u 2008 anu indidata a strada.

A via demucràtica s’hè imposta. Dopu à citatella  bastiaccia vinta da l’intusiàsimu di l’urne, a clandestinità  hà fattu anch’ella un passu maiò in 2014.

Pò 2010, 2015, 2017, in trè scrutini territuriali,  avemu scambiatu di versu à u quale s’hè  aghjustatu a legislativa… Oghje u naziunalìsimu hè  in capacità di pudè cambià a sorte di u so pòpulu.  Da u schjaffu di u riferendum di u 2003 à a  Cullettività ùnica di u primu di ghjennaghju 2018,  15 anni sò scorsi, indidentu un antru caminu chì  quellu di u cunflittu. Ssu 2 di ghjennaghju ci invita  à scrive un antra pàgina di stòria di u pòpulu  corsu. Una pàgina di custruzzione è d’avvene.

Ma tamantu hè u travagliu chì ci ferma ! Tamante  sò l’attese ! A nova Cullettività, u novu Esecutivu  è a so assemblea averanu à dà di pettu à mondu  scumesse. Rifiatu suciale, riacquistu ecunòmicu,  energìa, messa in ballu di u Padduc è lotta contr’à  a speculazione, à tempu autunumìa è salvezza di  a nostra lingua. Bisognu ci hè di u sustegnu criscente  di u pòpulu. Parte nostra, ci tocca à esse  degni di ssa cunfidenza è à ùn risparmià nè tempu  ne pena. Dispunibilità, travagliu, prubità. Eccu a  sòsula di a rièscita. Mettimu a manu in pasta !

Bon’annata à tutti !

Fabiana Giovannini.