Parechji, è forse frà i più ghjòvani, è forse frà l’omi pè u più, ssu tìtulu ùn parlerà tantu. S’hè morta Gisèle Halimi à l’età di 93 anni. Era una donna lìbera. Hè forse cusì ch’omu pò definisce u più ssa militente instanchèvule di i diritti di a donna. È ci vole à esse una donna per capisce quant’ellu hè diffìciule d’esse donna. È quant’ellu hè diffìciule d’esse donna lìbera ancu di più ! Nasce Zeiza Gisèle Elise Taïeb in u 1927 in Tunisìa è cunterà più tardi quantu a so nàscita hè stata una gattiva nutizia in famiglia. Palisava : « Quandu sò nata, i mei anu messu 15 ghjorni à palisà a mo nàscita. Una fèmina, à quell’èpica, era cum’una maledizzione ! » Zitelletta ne darà pochi capatochji à i so parenti ! À 10 anni, face a greva di a fame da pudè fà ricunnosce u so drittu à leghje libri ! À 16 anni, ricusa un matrimoniu accunciatu è si batte da pudè andà in Francia à fà studii di drittu. À 21 anni, hà u so diplomu d’avucata è volta in Tunisìa à fà u so mistieru ! Simu in u 1949, pocu dopu à a guerra è u dirittu datu à e donne di vutà (1946). Gisèle hè già una militente accanita di i diritti di e donne. È si batte per l’indipendenza di u so paese. Puru hà sempre tenutu a doppia naziunalità, francese è tunisiana, è u so core s’hè sempre spartutu trà i dui paesi. Maritata duie volte, averà trè maschji, è ssu nome d’Halimi (di u so primu maritu) fermerà u so nome d’avucata chì la face cunnosce cù e difese curagiose di càuse perse. À 33 anni, difende Djamila Boupacha, militente di u FLN algerianu accusata d’avè postu una bomba in u 1959 in Alger. Turturata è viulentata da suldati francesi in prigiò, Djamila hè amnistiata in u 1962, in grazia à a so avucata chì mubilizeghja l’upinione contr’à a tortura in Algeria, cù l’aiutu di Simone de Beauvoir, Jean-Paul Sartre, Louis Aragon… « A difesa per mè hè una manera di cambià u mondu » dice Gisèle Halimi. « Ùn ci vole micca à cunfonde un prucessu pulìticu cù un prucessu di dirittu cumunu. » À 38 anni, fonda u Muvimentu Demucràticu Feminile. À 44 anni, zifra cù Simone de Beauvoir, u manifeste di i 343, per chere u drittu à l’abortu pè e donne. « A donna è a donna sola deve esse lìbera di sceglie » dice torna Gisèle Halimi. A listessa annata, fonda u muvimentu Sceglie a càusa di e donne, sempre cù Simone de Beauvoir, per difende i dritti di e donne maltrattate. À 45 anni, difende Marie Claire, una ghjuvanotta di 16 anni, viulentata, chì ricunnosce avè aburtatu cù l’aiutu di a so mamma, perseguitata anch’ella. Viol o nò, l’abortu hè illegale in Francia. Marie Claire sorte lìbera di u Tribunale dopu à un prucessu chì Gisèle pulitizeghja. « Per tutte e lotte di e donne, sopratuttu ghjè a vigilanza ch’ellu ci vole à avè, perch’è pè e donne, più chè per l’omi, nunda ùn hè mai guadantu. » In u 1974, hè scuzzulata, inghjuliata è minacciata dopu à un prucessu induv’ella hà difesu duie donne viulentate. Riesce à fà ricunnosce u viol cum’un crìmine. Eletta deputata à l’Assemblea naziunale in u 1981, pò imbasciadrice di l’Unesco in u 1985… Gisèle Halimi ci laca parechji libri, ella chì rivendicava à 10 anni u dritu di leghje pè e donne.
A donna li deve assai.