Eccu un antra tappa francata pè u naziunalìsimu corsu ! I risultati sò frà i più belli per un scrutinu ch’ùn hè micca abitualmente favurèvule à a nostra famiglia pulìtica. A surpresa dunque hè bella, pè u più in u pumonte chì si pudìa cunsiderà cum’è più diffìciule.
Si pò avè qualchi rimorsu d’ùn avè sappiutu urganizassi più prestu per pudè fà una campagna di duie mesi, invece di strappassi a salute in quatru settimane à girà a Corsica sana ! Infine chì, ssu scrutinu ci dà une poche di lezziò. N’avemu da ritene sette quì ma ci ne serà forse di più.
– Prima di tuttu, i Corsi mantènenu a so cunfidenza à i naziunalisti. Ci hè vulsutu cinquant’anni per fali capisce quantu no èramu capaci d’esse purtavoci sodi è sinceri…
oghje, un annu è mezu dopu à a vittoria di u 2015, u naziunalìsimu hà vintu a cunfidenza di u pòpulu è a nostra prugressione ùn hè ancu compia a vi dicu !
– U pendiconi di ssa tendenza hè chì i Corsi n’anu una techja di u « sistema » è di i candidati esciuti da i partiti tradiziunali. È ancu sè a «macromanià » l’hà puntati un pocu, l’elettori in generale anu giratu u spinu ancu à i candidati chì parìanu menu « intaccati » da i so fiaschi, è più «novi » o «più prugressisti » : u discorsu di Pè a Corsica « voci di a Corsica in Parigi » hà marchjatu più chè « in marchja » ! A brama di cambiamentu cuntinueghja à spàrghjesi.
– Paca dinù l’unione, fruttu di a cuerenza di u messagiu naziunale dapoi l’arrestu di a viulenza pulìtica. I Corsi ricunnòscenu u discorsu ghjustu di i naziunalisti è u travagliu accanitu per ghjunghje à fà avvanzà e cose, malgratu tutti i tràmpali chì sò stati truvati, in quantu à u passivu di a Cullettività Territuriale (bugettu è funziunamentu generale). Hè una bella ricumpensa per tamanti sforzi fatti è tamanti chì ci fèrmanu à fà !
– A nostra forza, s’ella hè quella di i nostri capifila, riposa dinù nant’à centinaie di militenti è simpatizenti sparsi in tutta a Corsica. È ssa forza crescierà torna cù a strutturazione ch’ellu ci tocca à mette in balu ! Eccu ciò ch’ellu testimunieghja torna ssu scrutinu !
– Mà tuttu què ùn deve micca accecacci per vìa di l’astenzione. Più di 117.000 Corsi ùn sò micca andati à vutà… Vòlesi dì chì fèrmanu à cunvince per dumènica, ma dinù per l’avvene, chì sò Corsi «marginalizati » ch’ùn pudemu lacà da cantu.
– A nostra rispunsabilità infine hè tamanta. Perch’è à traversu ssu passu novu, hè un attesa immensa chì s’hè torna sprimata, à a quale ci tocca à risponde. U travagliu pò ci hè !
– U votu FN presidenziale ùn hè statu cunfirmatu. Hè piuttostu una bona nutizia. Si pò parlà ancu d’una cincinata postu ch’ellu si sfonde u risultatu di Marine Le Pen. Tantu megliu. Ma per sòrtesine definitivamente, bisogna à prumove d’altri raporti cù Parigi è ottene altr’indiature chì quella di u ricusu è u disprezzu.
I nostri candidati saperanu falla capisce. Dumènica, vutate Pè a Corsica.
Fabiana Giovannini.