Hè dunque per via di u puverettu di Jean-Frédéric Poisson (trà 1 è 2 % in i sundami) ch’ellu s’hè parlatu di a Corsica à u dibàttitu di e primàrie di a diritta. Hà dettu chì u pòpulu corsu esiste, l’altri candidati anu risu.
Jean-Frédéric Poisson averà riesciutu a prova di discità appena un dibàttitu chì s’addurmintava.
Hà principiatu per dì chì «la Corse c’est un département particulier», è s’hè fattu ripiglià da Nicolas Sarkozy cuntentu cum’è un pichju è da Alain Juppé « non, deux départements ! »
Circhendu di ripigliassi, Ghjuvanfedericu Pesciu a li sciacca: «deux départements, mais un peuple ! »
Si vede allora Alain Juppé fà u musu «c’est pas un peuple!», François Fillon lampa un sguardu azezu è Nicolas Sarkozy cuntinuveghja di ride.
Nisuna surpresa, a ricunniscenza di u pòpulu corsu ùn hè micca à l’òrdine di u ghjornu è dapoi chì a merrìa di Bordeaux hè stata plasticata in u 1996, Alain Juppé hà poca simpatìa pè e rivendicazioni naziunaliste.
Ma ùn hè tantu bastatu per mubilizà i patriotti à prò di Jean-Frédéric Poisson sta dumènica sera…
Da rivede ssu pezzu di dibàttitu in u filmettu nant’à u nostru situ. ■